Aripov Tojikistonga boradi, prezident rasmiy tashrifiga tayyorgarlik muhokama etiladi

O‘zbekiston bosh vaziri Abdulla Aripov Tojikiston poytaxti Dushanbega 10-11 yanvar kunlari amaliy tashrif bilan keladi. Bu haqda «AP» Tojikiston hukumatidagi manbaga tayangan holda xabar bermoqda.

O‘zbekiston bosh vazirining Dushanbega tashrifi chog‘ida Tojikiston prezidenti Imomali Rahmon va respublika bosh vaziri Qohir Rasulzoda bilan uchrashuv o‘tkazilishi kutilmoqda.

Abdulla Aripovning Tojikiston rasmiylari bilan uchrashuvlari va muzokaralari chog‘ida O‘zbekiston prezidenti Shavkat Mirziyoyevning Dushanbega bahor oylari boshida kutilayotgan rasmiy tashrifiga tayyorgarlik ko‘rish masalalari muhokama qilinadi.

Bundan tashqari, Aripovning Dushanbega tashrifi chog‘ida tomonlar Tojikiston va O‘zbekiston o‘rtasidagi savdo-iqtisodiy hamkorlikni kengaytirish, ikki davlat chegarasidagi bahsli qismlarning demarkatsiyasi va delimitatsiyasini tezlashtirish bo‘yicha masalalarni muhokama qiladi.

Eslatib o‘tamiz, prezident Shavkat Mirziyoyev Toshkent viloyatiga tashrifi chog‘ida viloyat faollari bilan uchrashuvda ushbu tashrif haqida ham aytib o‘tgandi. 

“Abdulla Ne'matovich Tojikistonga borib, rasmiy tashrifga tayyorgarlik ko‘rib keladi. Biz katta-katta shartnomalarga qo‘l qo‘yib, Tojikiston bilan temir yo‘l ham ochiladi, elektr energiyasini uzatishni ochishga ham kelishdik. Qo‘shni bilan qanday yashagan bo‘lsa, shunday yashash kerak. Hamma o‘tadi bu dunyodan, lekin qo‘shni bilan yaxshi bo‘lmaganni hech kim, hech qachon kechirmaydi. Shuni hamma bilishi kerak. Bu oson emas – 20 yillik muzni eritish kerak. Dunyo hamjamiyati bizga nima deydi: sen oldin qo‘shning bilan til topishgin, keyin biz sen bilan do‘st bo‘lamiz. Sen qo‘shning bilan til topishmasang, sen qanday biz bilan do‘st bo‘lishing mumkin, deydi”, - deya aytib o‘tdi davlat rahbari.