Jazolash emas, tarbiyalash muhim

Sud zalining qora kursisida hayot ostonasiga endi qadam qo‘ygan yoshlar o‘tirganini ko‘rgan kishilarning dili og‘riydi, qalbini afsus va achinish hisi qamrab oladi. Afsuski, keyingi paytda voyaga yetmaganlar tomonidan turli huquqbuzarlik va jinoyatlar sodir etilishi tez-tez kuzatilmoqda. Bu holat, o‘z navbatida, ularning jinoiy javobgarlikka tortilishiga sabab bo‘layotir, deb yozadi “Postda” gazetasi.

Poytaxtning Shayxontohur tumanida yashaydigan O‘.Qodirbekning sudlanuvchi nomini olishiga uning oilada erka o‘sgani, ota-onasining nazoratidan chetda qolgani sabab bo‘lgan. Ko‘cha-ko‘yda bemaqsad, besamar yurishga, ko‘ngliga kelgan ishni qilishga odatlangan Qodirbek Bobur ko‘chasidagi bog‘da ikki-uch tengdoshi bilan valaqlashib o‘tirganida ro‘paradan K.Ravshan kelayotganini ko‘rib, undan sigaret so‘raydi. Yigitcha chekmasligini aytganida bu javob unga yoqmay janjal chiqaradi va mushtlasha boshlaydi. Ravshanning bo‘sh kelmayotganidan achchig‘i chiqqan Qodirbek yonidan pichoq chiqarib, uning bir-ikki joyiga sanchib oladi. Og‘ir tan jarohati olgan Ravshan tezda shifoxonaga olib boriladi. Xayriyatki, shifokorlarning sa'y-harakati tufayli uning hayoti saqlab qolinadi.

Voyaga yetmaganlar o‘rtasida internet tarmog‘idan g‘arazli maqsadlarda foydalanish holatlari ko‘payib borayotgani ham tashvishlanarli, albatta. Mirobod tumanida yashovchi K.Dilnoza firibgarlikning antiqa usulini o‘zlashtirib oladi. Voyaga yetmagan bu qiz internet saytida o‘z sahifasini ochib, Aziza ismli tengquri va uning onasi suratini joylashtiradi va tagiga uyatsiz so‘zlar yozib qo‘yadi. Keyin buni o‘sha qizga ko‘rsatib, agar ming dollar bersa u rasmni internetda o‘chirib berishini aytadi. Aziza unga ishonib, aytilgan pulni unga beradi. Ammo Dilnoza bu bilan qanoat qilmay, yana pul talab qila boshlaydi. Aziza onasining tilla taqinchoqlarini olib keladi. Qarangki, Dilnoza internetdagi suratni Azizani yaxshi ko‘rgan yigitga ko‘rsataman deb po‘pisa qilib, yana pul so‘raydi. Xullas, voqeadan xabar topgan qizning onasi ichki ishlar organiga murojaat qiladi. Dilnoza Azizadan pul olayotgan paytda qo‘lga tushadi.

Ma'lumki, har qanday huquqbuzarlik yoki jinoyatning oqibatlari bilan kurashish emas, balki ularning oldini olish maqsadga muvofiq. Shu ma'noda aytish mumkinki, voyaga yetmaganlar tomonidan sodir etilgan jinoyatlarni tergov qilish, ularga nisbatan turli majburlov hamda jazo choralarini tayinlashda ularni jazolash emas, balki tarbiyalash muhimdir. Zero, bu voyaga yetmagan va yoshlarning takroran jinoyat sodir etishining oldini olishga xizmat qiladi.