Венесуэлада инфляция 2600 фоиздан ошди
01:38 / 09.01.2018
6982
Фото: AP

2017 йил натижаларига кўра Венесуэлада инфляция 2616 фоизга етди. Бундай маълумотни Венесуэла мухолифати назоратида бўлган миллий ассамблеянинг молия қўмитаси маълум қилди. 

“Декабрда нарх-наво 85 фоизга ошди, умумий инфляция эса 2616 фоизга етди”, деб айтган қўмита аъзоси Рафаэл Гусман. Унинг таъкидлашича, Венесуэла гиперинфляция кузатилаётган дунёдаги ягона давлат бўлди. 

Қўмитанинг яна бир аъзоси Хосе Герранинг прогнозига кўра, 2018 йилда Венесуэла гиперинфляция суръатлари тезлашишига дуч келиши мумкин.

“Агар парламент чақириқлари эътиборга олинмаса, 2018 йилда 14 минг фоизлик гиперинфляцияга келамиз. Бирор нарса сотиб олиш учун ресурслар бўлмайди, халқ эса 30 млн кишини боқиш учун етарлича маблағи бўлмаган ҳукуматга боғлиқ бўлади”, деб айтган Герра. 

Герранинг айтишича, 2017 йил декабрда нархлар 85 фоизга ошган ва бу Лотин Америкасининг барча давлатларида йиғилиб қолган умумий инфляциядан кўпроқдир. “Гиперинфляцияга ҳукуматни молиялаштиришни давом эттириш учун Венесуэла марказий банки томондан пуллар босилиши сабаб бўлди”, деб айтган депутат.

2017 йилда президент Николас Мадуро бошчилигидаги ҳукумат 5 марта мамлакатдаги энг минимал иш ҳақини оширган. Жорий йил 1 январидан у 177,5 минг боливардан 248,5 минг боливаргача оширилган. Давлат курси бўйича 1 доллар 10 боливар туради, бироқ қора бозорда доллар учун 111 минг боливар сўралмоқда.

Охирги йиллар давомида Венесуэла жадал инфляция ва миллий валюта қадрсизланиши билан кечаётган ўткир ижтимоий-иқтисодий инқирозни бошдан кечирмоқда. Халқаро валюта жамғармасида мамлакатда 2018 йилда нарх-наво ўсиши 2349 фоизни ташкил қилиши тахмин қилинмоқда.  


Улашинг
Top