Join KUN.UZ Telegram каналига қўшилинг ва энг сўнгги янгиликлардан хабардор бўлинг! Аъзо бўлиш
x
«Телеканал раҳбари қаёққа қараяпти?» - Келин қайнотани шилқимликда айблаши экранга олиб чиқилиши танқид қилинди
14:30 / 14.01.2018
103466

Ўзбекистон халқ шоири Хуршид Даврон «Ўзбекистон» телеканалининг «Учбурчак» кўрсатуви ҳамда унинг бошловчилари Нозима Воҳидова ҳамда Нилуфар Умрзоқовани кескин танқид қилди.

«Учбурчак» ток-шоусининг 2017 йилнинг 23 декабрь сонида Мухлиса исмли келин чиқиш қилиб, унга қайнотаси севги изҳор қилгани, бунинг ортидан оиласи бузилиб кетаётгани ҳақида маълум қилган эди. Кўрсатувнинг 6 январь сонида келини томонидан шилқимликда айбланган қайнота ва унинг аёли чиқиш қилиб, келиннинг сўзларини рад этди.

«Қайнотам шаҳват билан қаради...», «Бировнинг хотинини севаман...»: Инсоният карантинга муҳтож

Мазкур кўрсатув ҳақида Ўзбекистон халқ шоири Хуршид Даврон Фейсбукдаги саҳифаси орқали ўз муносабатини билдирар экан, бошловчиларни «фаросатсизлик»да айблаган:

«Ўзбекистон» телеканалида намойиш этиладиган «Учбурчак» телелойиҳасининг сўнгги кўрсатувларида авжига чиқа бошлаган уятсизликка чидаб бўлмайди. Кўрсатув муаллифлари Нозима Воҳидова билан Нилуфар Умрзоқовани (савиясиниям, даражасиниям) яхши биламан, ҳар қалай улар 20 йил давомида ТВда ишлаган йилларим кўз ўнгимда бўлишган. Бу ўринда мен бу иккисидан кўра, энг аввало, «Ўзбекистон» телеканали раҳбари қаёққа қараяпти, деган саволни бераман.

Қолаверса, Ўзбекистон телерадиокомпаниясининг раҳбарлари Президентга ёқаман деб, эрта-ю кеч «Ўзбекистон–24» канали билан шуғулланавермай, бошқа телеканалларга ҳам ҳеч бўлмаганда «мўралаб» турсалар яхши бўларди», дейилади постда.

Шоир фикрини давом эттирар экан, бундай кўрсатувлар болалар руҳиятиги салбий таъсир кўрсатиб, алал оқибат ўз жонига қасд қилишгача олиб бориши мумкинлигидан огоҳлантирган.

«Учбурчак» телелойиҳасининг сўнгги кўрсатувларини миллий атворимиз-у ақидаларимизга қарши қаратилган рахна (диверсия) деб биламан. Бундай номақбул, таназзулдаги Ғарбнинг оила, никоҳ ва миллий қадриятларни рад этувчи ғайриинсоний қарашларини тарғиб этувчи кўрсатувлар эртага жамиятимиз ҳаётига бемисл даражада салбий таъсир кўрсатиши мумкинлигини нега тушунмайдилар.

Мен бу хусусдаги муносабатимни алоҳида мақолада баён қилишимни маълум қилиб, ТВ ходимларини, уларга масъул «тепадагилар»ни бир нарсадан огоҳ қиламан. Бир пайтлар (ўтган асрнинг 70-йилларида) шоҳ замонидаги Эронда худди шундай мавзудаги, яъни уятсизликларни очиқ-ойдин кўрсата бошлаганларида, ўша шарманда она-ю оталарнинг қилмишларига чидолмасдан ўнлаб болалар ўз жонларига қасд қилганлари маълум. Агар эртага «Учбурчак»да шармандалик қилган кимсаларнинг болаларидан биронтаси ўзини ўлдирса, бунга энг аввало, ТВ раҳбарлари, жумладан «Учбурчак»нинг бефаросат муаллифлари ҳам жавоб беришлари шартлигини унутмасинлар. Бу дунёда бўлмаса, Яратганнинг олдида жавоб берадилар.

Зеро, бугунги интернет замонида бирон гап айтилган жойида қолиб кетмайди. Айниқса, бундай уятли гаплар интернет орқали ўша шарманда аёлларнинг маҳаллаларига, фарзандлари таълим олаётган мактаб ўқувчилари орасида бир пасда тарқалиб кетади. Табиий равишда, ўша ўзини шарманда қилган аёллар болаларини қўллари билан нуқиб кўрсата бошлашади. Бундай уятсизликка эса ёш боланинг руҳияти дош беролмайди.

Интернет тармоғи жуда бешафқат. Унинг бераҳм шафқатсизлиги туфайли дунёда минглаб болалар ўз жонларига қасд қилмоқда. Шу гапларни ёзатуриб, кўзим янги маълумотга тушди: Австралияда тенгдошларининг интернет орқали билдирган киноя ва мазахлар туфайли 12 ёшли қизалоқ ўз жонига қасд қилибди…

Демократия ва сўз эркинлигини чегарасизлигу уятни унутиб ҳамма гапни очиқ айтиш деб тушунмаслик керак. Зеро, буюк шоир ёзганидек:
Дунёда чегара кўпдир ва лекин
Ёлғиз уятсизлик чегараси йўқ…», дейилади шоирнинг фейсбукдаги саҳифасида.


Улашинг
Top