Atamboyev qachon katta siyosatga qaytadi? 

Qirg‘izistonlik sotsial-demokratlar o‘zlarining umumrespublika qurultoyini o‘tkazish sanasini ma'qullashmoqda. Bu haqda 24.kg partiya siyosiy kengashi a'zosi, parlament deputati Marat Omonqulovga tayangan holda xabar berdi.

Uning so‘zlariga ko‘ra, qurultoy, dastlabki ma'lumotlarga qaraganda, fevral oxirida bo‘lib o‘tadi. Aniq sana hozircha aniqlanmadi, biroq tayyorgarlik olib borilyapti.

Kun tartibiga faqat bitta masala qo‘yiladi – mamlakat sobiq prezidenti Almazbek Atamboyevni siyosiy tashkilot raisligiga ilgari surish va saylash.

Almazbek Atamboyev davlat rahbari lavozimida bo‘lgan paytida jurnalistlarga siyosatda qolishi hamda partiyani yangilash bilan shug‘ullanishi haqida ma'lum qilgandi. Sobiq prezident bo‘lajak parlament saylovlarida Qirg‘iziston SDP partiya ro‘yxatida boshchilik qilishini ham ta'kidlab o‘tgan.