Neymar yangi Figu bo‘ladimi? «Real» uni Ronalduga almashmoqchi

Futbol tarixida yana bir yirik transfer ro‘y berishi haqida mish-mishlar bolalamoqda. Krishtianu Ronaldu «Real»dan, Neymar «PSJ»dan ketishni istayotgani haqidagi xabarlar fonida ikki grand jamoa ushbu futbolchilarni almashtirishi mumkin.

Parijdan ko‘ngil sovish

O‘tgan yilning avgustida 222 million yevro evaziga «Barselona»dan «PSJ»ga o‘tib, transferlar rekordini hech kim yeta olmaydigan cho‘qqiga yetkazib qo‘ygan Neymar yana Ispaniyaga qaytishni istayotgani haqidagi xabarlar noyabr oyidayoq paydo bo‘ldi. Kimdir Neymar Parijda zerikayotgani haqida gapirdi va OAV uning nomini «Real» bilan bog‘lay boshladi. Kavani bilan penalti borasidagi bahs olovga moy quydi (ikki lotin amerikalik futbolchi penaltini kim tepishini hal qila olishmagandi). Qo‘shimcha mashg‘ulotdan bo‘yin tovlaganidan keyin Neymar va bosh murabbiy Unai Emeri munosabatlari ham sovuqlashdi, braziliyalik futbolchi jamoaning argentinalik legionerlari Di Mariya va Pastore bilan ham yaxshi munosabat o‘rnata olmadi (Di Mariya sobiq madridista sifatida Neymar bilan oldindan yaxshi munosabatda bo‘lmagan, Pastore esa Neymarga o‘zining o‘yin raqamini berishga majbur bo‘lgandi). Terma jamoa ixtiyorida ekanida undan Parijga qanday moslashgani haqida so‘rashganida u yig‘lab yuborgan, terma jamoa murabbiyi uni bazo‘r ovutgandi. Bu voqealardan keyin Madriddan unga sovchilar bora boshlashdi.

Neymar yana o‘z transferini sotib olishi mumkinmi?

Ispaniyadagi El Chiringuito nashri sensatsion xabarni e'lon qildi: emishki, futbolchining Parij klubi bilan shartnomasida belgilangan tovon puli miqdori u sotib olingan 222 million yevroga teng, futbolchining o‘zi «Real» shu pulni to‘lab, uni olib ketishini istamoqda. Bu holda Neymarning o‘zi yana bu pulni to‘lab, Madridga transfer qilinishini ta'minlashi mumkin bo‘lardi. Ammo bir necha kun o‘tib parijliklar klubi vakillari bu xabarlarni inkor qilib, «aldash yaxshi emasligi»ni aytib chiqishdi.

Ronaldu bilan rokirovka

«Real» Neymarni olib ketishi murakkab ish. Marca Neymarning transferi «Qirollik klubi»ga 400 million yevroga tushishi, shu tufayli «Real» 2019 yil yozigacha yirik transferlar amalga oshirmasligi haqida yozdi. Bir necha manba ikki klub prezidentlari Florentino Peres va Nosir Al-Xilayfiyning do‘stona munosabatlari tufayli jamoalar o‘z yetakchilarini oshirishi haqiqatga yaqin ekani haqida bong ura boshlashdi.

Turgan gapki, ayni paytda Ronalduni Neymarga almashish varianti ustida Peres ikki marta o‘ylab o‘tirmaydi. Birinchidan, Krishtianu Ronaldu bir oydan keyin 33 yoshga chiqadi (braziliyalik futbolchi esa hali 26 yoshda). Ikkinchidan, Neymar Madridda ham kosmik miqdorda maosh olishi kerak va Madriddagilar ikkita yulduzi uchun katta mablag‘ni maosh sifatida to‘lashni ma'qul ko‘rmagan bo‘lardi. Poytaxtliklar klubi yoki Ronalduning ham maoshini Neymarniki bilan tenglashtirishi yoki undan qutulishi talab etiladi. Ikkinchi variant Peresni moliyaviy jihatdan to‘la qoniqtiradi. Uchinchidan, Ronalduning o‘zi ketishni istamoqda, u hozir Parijga o‘tmasa, shartnoma muddati tugaganida, 2 yildan keyin u bu jamoaga kerak bo‘lmay qoladi. Shu tufayli Madrid Neymarning transfer narxiga Ronalduni qo‘shib berishi haqida xabarlarda asos bor.

Qolaversa, Ronaldu o‘zini klub rahbariyati, xususan, Florentino Peres tomonidan aldangan his qilmoqda. U klub prezidenti maoshini ko‘tarishga va'da berib (Lionel Messi va Neymarniki kabi kamida 40 million yevro - yillik maosh), bu va'dani bajarmay kelayotganidan xafa.

Peres rozi

Portugaliyadagi Diario Record nashri tarqatgan xabarga ko‘ra, Florentino Peres Ronalduning agenti Jorjye Mendesh bilan gaplashgan va u mijozi uchun yangi klub axtarishni boshlashi mumkinligini aytgan.

Peres portugaliyalik futbolchi uchun uning shartnomasida belgilangan 1 milliard yevroni talab qilmaydi va «Real» Krishtianuni munosib bahoga sotishga rozi bo‘ladi.

O‘z navbatida «PSJ» Ronalduni sotib olishga rozi bo‘lmoqda. Ammo fransuzlar «Real»ga  Neymarni bermoqchi emas.

Ispaniya matbuoti esa Neymar yozda Madridga yo‘l olishi haqida ishonch bilan yozmoqda.

Uchinchi urinish

Neymarning yo‘li shu vaqtgacha «Real» bilan ikki marta kesishgan. 14 yil oldin 12 yoshida Neymar otasi hamda agenti Vagner Ribeyru bilan birga Madridga kelgandi. Bu tashrifdan maqsad «Qirollik klubi» murabbiylarida yaxshi taassurot qoldirish va shartnoma imzolash bo‘lgandi. O‘shanda Neymar ilk mashg‘ulotda tengdoshi Dani Karvaxal bilan tanishgan, Neymarlar oilasi poytaxtda 2 hafta o‘tkazishgan. Murabbiylar uning o‘yinidan qoniqish hosil qilgan, ammo o‘shanda Ribeyru shartnoma imzolanishi uchun talab qilgan 60 ming yevroni ko‘p ko‘rishgandi. Natijada, Neymar Braziliyaga qaytib ketgan.

Ikkinchi urinish 2013 yilda ro‘y bergan. O‘shanda San-Pauluga «Real»ning tibbiy bo‘limi rahbari Karlos Diyes Neymarning holatini tekshiruvdan o‘tkazish uchun uchgandi. Bu haqda bilgan «Barselona» esa «otni qamchilaydi» va braziliyalik futbolchi yakunda Ispaniya poytaxtiga emas, Kataloniya poytaxtiga keladi. Uchinchi urinish muvaffaqiyatli bo‘ladimi, Neymar yangi Figu bo‘lishga va «Kamp Nou»da o‘ziga qaratiladigan g‘azabni qabul qilishga tayyormi? Buni yaqin yarim yil ichida bilib olishimiz mumkin.