Bojxona sohasida yagona ekspress-laboratoriyalar tashkil etiladi

Prezidentning Oliy Majlisga murojaatnomasida ruxsatnoma hujjatlariga alohida to‘xtalib, tovarning turiga qarab muvofiqlik, gigiyenik yoki veterinariya bo‘yicha sertifikatlarsiz tovarlarni bojxona omboridan chiqarishga yo‘l qo‘yilmasligini, bojxona omborlari ekspress-laboratoriyalar bilan jihozlanmaganligi, bu jarayonlar ochiq va oshkora emasligi va bu haqda mutasaddi idoralar bong urmaganligi alohida ta'kidlab o‘tildi.

Shuningdek, 2018 yilning 5 yanvar kuni prezident Toshkent viloyatida amalga oshirilayotgan islohotlar, bunyodkorlik ishlari bilan tanishish maqsadida mazkur viloyat hududida yangi qurilgan “Highway Logistics center” terminaliga tashrifi mobaynida tovarlarni sertifikatlash jarayoni uzoq muddat amalga oshirilishi qayd etilgan edi.

Davlat rahbari ta'kidlaganidek, hozirgi kunda tovarlarni bojxonada rasmiylashtirishda tovarlar uchun muayyan ruxsatnoma hujjatlari olinishi lozim. Muvofiqlik sertifikati, fitosanitar sertifikati, veterinariya sertifikati, sanitariya-epidemiologik xulosa (gigiyena sertifikati), ozon yemiruvchi moddalarni va tarkibida shu kabi moddalar bo‘lgan mahsulotlarni olib kirish va olib chiqish uchun ruxsatnoma hamda ekologik sertifikatlari shular jumlasidandir.

Sertifikat va ruxsatnoma hujjatlari 5 ta vazirlik tomonidan ketma-ketlikda 30 kun ichida beriladi. Bundan ko‘rinib turibdiki, tovarlar uchun har bir sertifikatlash yoki ruxsatnoma hujjatlarini rasmiylashtirish jarayoni tadbirkorlar uchun ko‘p vaqt talab etadi. Bu esa, tovarlarni omborlarda turib qolishiga sabab bo‘lmoqda.

Davlat bojxona qo‘mitasi tomonidan tovarlarni sertifikatlash borasida tadbirkorlik sub'yektlari duch kelayotgan muammolar va qiyinchiliklar atroflicha tahlil etilib, omborlar, bojxona postlari va terminallarini fitosanitariya, gigiyenik, ekologik, veterinariya va muvofiqlik sertifikatlarini tezkor tarzda berish imkoniyatini yaratadigan ekspress-laboratoriyalar bilan jihozlash choralarini ko‘rish maqsadida tegishli vazirlik va idoralar bilan hamkorlikda ish olib borilmoqda.

Shuningdek, bu borada hamkorlikdagi ishlarni muvofiqlashtirish, mavjud muammolarning yechimini topish maqsadida o‘tkazilgan yig‘ilishda “O‘zstandart” agentligi, Sog‘liqni saqlash vazirligi, Davlat veterinariya qo‘mitasi, Ekologiya va atrof-muhitni muhofaza qilish davlat qo‘mitasi, Vazirlar Mahkamasi huzuridagi O‘simliklar karantini davlat inspeksiyasining sertifikatlash bo‘limlari rahbarlari ishtirokida mazkur vazirlik va idoralar tomonidan o‘zaro hamkorlikda yagona ekspress-laboratoriya tashkil etgan holda faoliyat olib borishga kelishib olindi.

Dastlabki bosqichda bu kabi ekspress-laboratoriya Toshkent viloyati Zangiota tumanida joylashgan “Highway Logistics center” terminalida tashkil etiladi.