Pentagon sobiq rahbari Eshton Karterning ma'lum qilishicha, NATO Rossiya bilan ehtimoliy mojaro holati bo‘yicha harbiy harakatlar rejasini ishlab chiqishi lozim. Bu haqda RIA «Novosti» xabar berdi.
Karter Davosda Butunjahon iqtisodiy forumi doirasidagi kiberxavfsizlik masalalari bo‘yicha sessiyada shunday bayonot bilan chiqdi.
«Mening fikrimcha, bizga va NATOdagi hamkasblarimizga Rossiyaga qarshi harbiy harakatlar rejasini ishlab chiqish kerak. Shuningdek, bizga Boltiqbo‘yi mamlakatlariga «yashil odamchalarning» ehtimoliy bostirib kirishi holati yuzasidan reja kerak, Rossiya u yerda milliy ozchilikdan foydalanishi mumkin», - deya Karterning so‘zlarini keltiradi agentlik.
Uning so‘zlariga ko‘ra, AQSh Rossiyani Berlin devori qulaganidan beri harbiy raqib sifatida ko‘rmagan, biroq ayni damga kelib vaziyat o‘zgardi.
Eslatib o‘tamiz, avvalroq Ukraina prezidenti Pyotr Poroshenko yevropalik hamkasblariga Rossiya «tajovuzkorligi»ga qarshi koalitsiya tuzish taklifi bilan murojaat qilgandi.
