Ayol quyushqondan chiqqanda...

Xalqimizda shunday naql bor: “Safarga chiqishdan oldin sherikning yaxshisini, uy olishdan avval esa qo‘shnining afzalini tanla”. Bu ayni topib aytilgan hikmat. Qo‘shning tinch bo‘lsa, sen ham tinch bo‘lasan. Agar qo‘shning notinch bo‘lsa, buning ta'siri seni ham chetlab o‘tmaydi, deb yozmoqda “Postda” gazetasi.

Soat 22:30lar atrofida. Ko‘p qavatli xonadonlarda yashovchilarning aksariyati bu vaqt tungi uyquda. Poytaxtdagi shunday xonadonlarning birida istiqomat qiluvchi Dildora (ism-shariflar o‘zgartirildi) ikki farzandini uxlatib, yotoqxonasiga yo‘l oldi. Yoz oyi, havo issiq, shu sabab bo‘ldi, shekilli, anchagacha uxlay olmadi. Shu payt tashqaridan ayollarning kulgani eshitildi. Bu qo‘shnilari bilan munosabati yaxshi bo‘lmagan Dildoraning g‘ashini keltira boshladi. Kulgi hadeganda tinavermagach, u derazadan pastdagi ayollarga qarab “jim bo‘lasizlarmi-yo‘qmi?!” deya baqirdi. Ular orasida Xadicha ham borligini ko‘rib battar jig‘ibiyron bo‘ldi.

Dildora Xadicha bilan sira kelisha olmagani sababli uni ko‘rarga ko‘zi, otarga o‘qi yo‘q edi. Ular bir-ikki bor janjallashgan, o‘rtadagi mojaro hatto sudgacha yetib borgandi. O‘shanda Dildora qo‘shni ayoldan uzr so‘rashga majbur bo‘lgan, shundan so‘ng ularning ishi yarashuv bilan yakunlangan edi. Shu sababli qanday qilib bo‘lsa ham alamini olishga harakat qilib yurgan Dildora uchun bu ayni muddao bo‘ldi.

Pastda xush-xandon gaplashib turgan qo‘shnilar Dildoraning baqirganiga e'tibor berishmadi.

- Ovoz Dildoraning uyidan kelyaptimi? Yana bolalarini urishayotgandir-da. Qachon qarama, ahvol shu. Qo‘shnilariga ham tinchlik bermaydi. Hali uni bilan tortishgan, hali bunisi bilan.

- Ha, to‘g‘ri aytasiz, Xadicha. Bundaylar bilan tortishib o‘tirmagan ma'qul. Hozir pastga tushib bir baloni boshlab o‘tirmasin yana, yuring, uyga kira qolaylik, - deya qo‘shni ayollar o‘rnilaridan turishgan ham ediki, yo‘lakda Dildora ko‘rindi. Qo‘lida uyali telefon.

- Nima qilyapsan? Ol telefoningni! Men senga gapiryapman! – Xadicha shunday dedi-yu, ularni videotasvirga olayotgan Dildorani chetga itardi. Shunda Dildora Xadichaning qo‘lini qayirib, yuzi va yelkalarini tirnab tashladi. Bu ham senga kam degandek, uning oyog‘iga bor kuchi bilan tepdi. Qo‘shni ayol ularni ajratishga harakat qilib, Dildoraning qo‘lidan ushlab tortgan edi, u Xadichani itarib yubordi va uyiga kirib ketdi.

- Xadicha tuzukmisiz? Jarohatlanmadingizmi? Yuring, uyingizga olib kirib qo‘yamiz. Bundan har narsani kutish mumkin.

Shundan so‘ng hamma uyiga kirib ketdi. Alamidan chiqa olmagan Dildoraning esa fig‘oni falakka o‘rladi. Qanday qilib bo‘lmasin, o‘ch olgisi keldi. O‘ylay-o‘ylay qo‘liga bolta olib pastga tushdi. Uy oldida hech kim yo‘q edi. Bundan unumli foydalanmoqchi bo‘lgan Dildora Xadichaning mashinasi tomon yo‘l oldi.

- Ana endi ko‘rasan! Boshqa men bilan o‘chakishmaydigan bo‘lasan! Mana senga! Mana senga! – deb mashinaning old oynasiga bolta bilan ura boshladi. Bir necha bor urilgan zarbdan so‘ng mashina oynasi chil-parchin bo‘lib to‘kildi. Dildora bu bilan tinchlanmadi. Yana boshqa bir qo‘shniga tegishli avtomashinaning old oynasini ham bolta bilan urib sindirdi.

Uyiga kirganiga ko‘p bo‘lmay ko‘chada nimaningdir chil-chil singan ovozini eshitgan Xadicha derazadan tashqariga qaradi. Shunda u Dildoraning bolta ko‘tarib ketayotganini ko‘rib, yugurib ko‘chaga chiqdi. Ahvolni ko‘rgach, tuman IIB xodimlariga xabar berdi. Yuz bergan voqea yuzasidan xodimlar tomonidan tergov harakatlari olib borilib, Dildora Qosimovaga nisbatan tegishli jazo chorasi belgilandi.