Insonga aql nima uchun berilgan? Har bir qilayotgan ishini o‘ylab, mushohada qilish uchun emasmi? Ayrimlarning xatti-harakatini ko‘rib: “Bu inson rostdan ham amaldagi qonunchilikni bilmaydi chog‘i”, degan xayolga borasan dastlabki xulosalaringda. Biroq uning “hayot tarixi”ni varaqlar ekansan, undagi “ilmsizlik” bir “kasallik” ekaniga amin bo‘lasan, deb yozmoqda “Huquq” gazetasi.
Namangan tumanilik Sharof G‘aniyev (ism-familiyalar o‘zgartirilgan) ham shunday “ilmsiz”lar toifasidan ekan. Uni qo‘shtirnoq ichidagi ilmsiz, deyishga to‘la asos bor. Boisi, u muqaddam ham o‘z uyida noqonuniy tarzda yashirin sex tashkil etgan, qilmishi fosh bo‘lib, sud hukmi bilan jinoiy javobgarlikka tortilgan edi. Demak, bu borada yaxshigina tushunchasi bor. Biroq u bunday xulosa chiqarmadi. To‘g‘rirog‘i, nafsining izmidan chiqolmadi. Natijada yana o‘z xonadonida yashirin sex tashkil etib, noqonuniy tarzda alkogol mahsulotlari tayyorlashga kirishdi.
Albatta, noqonuniy boshlangan ishning oxiri hamisha “voy” bo‘lgan. Shu ma'noda, Sh.G‘aniyev o‘tgan yilning 27 martida o‘z uyida bir fuqaroga 210 dona aroq va 150 litr vino mahsulotini 1 mln 800 ming so‘mga sotayotgan paytda SVOJJDLQK departamentining Namangan tuman bo‘limi xodimlari tomonidan ushlandi.
Xolislar ishtirokida uning xonadoni ko‘zdan kechirilganida, 285 dona 0,45 litrli aroq, turli idishlardagi 200 litr vino va boshqa jihozlar borligi aniqlandi. Mutaxassislar bularning barini 2 mln 542 ming so‘mga baholashdi.
Sh.G‘aniyev avvalgi qilmishidan xulosa chiqarib olmagani bois, bu galgi sud muhokamasidan keyin to‘rt yil muddatga ozodlikdan mahrum etildi.
