Kubaga qarshi javob bahslari uchun tarkib ma'lum. Ikki olimpiyachi safda

27 fevral kuni WSB musobaqasidagi Uzbek Tigers jamoasiga qarshi O‘zbekistonda javob uchrashuvlari o‘tkazadigan Kubaning Cuba Domadores klubi janglar uchun tarkibni ma'lum qildi.

Taqvimga ko‘ra, 10 fevral kuni o‘zbekistonlik bokschilar Kubada mehmon bo‘ladi. 27 fevral kuni esa kubaliklar Termizda ringga chiqadi. 

Fazliddin G‘oibnazarov va Rustam To‘laganov ortidan professional ringga o‘tib ketgan Shahram G‘iyosov va Murod Ahmadaliyev endi jamoaga yordam bera olmaydi. Lekin Kubaga qarshi janglarda Rio Olimpiadasi qahramonlaridan ikki nafari Hasanboy Do‘stmatov va Shahobiddin Zoirov safda.

O‘zbekiston boks federatsiyasi  bergan ma'lumotga ko‘ra, Termizda quyidagi juftliklar hosil bo‘ladi:

-49 kg: Hasanboy Do‘stmatov - Oskar Argilagos
-56 kg: Shahobiddin Zoirov - Robeysi Ramires
-64 kg: Iqbol Xoldorov - Andi Kruz Gomes
-75 kg: Isroil Madrimov - Arlen Lopes
-91 kg: Sanjar Tursunov - Erislandi Savon

10 fevral kuni safarda bo‘ladigan janglar uchun esa quyidagi tarkib tanlangan:
-52 kg: Xudoynazar Fayzov
-60 kg: Shunqor Abdurasulov 
-69 kg: Mahmud G‘oipov 
-81 kg: Madiyor Saidrahimov 
+91 kg: Bahodir Jalolov 

Ma'lumot uchun, Uzbek Tigers WSB turnirida avvalgi ikki mavsumda ham Kubadan yengilgan. Bu mavsumda esa jamoalar guruh bosqichidayoq o‘zaro to‘qnash kelmoqda. O‘zbekistonga guruhda Kolumbiya va Venesuela jamoalari ham raqiblik qiladi. Ushbu guruhda dastlabki ikki o‘rinni egallagan jamoalar chorak finalga chiqadi.