Qizilmiya yetishtiruvchilar uyushmaga kirishi mumkin

Vazirlar Mahkamasining 27.01.2018 yildagi 63-son qarori bilan Qizilmiya va boshqa dorivor o‘simliklarni yetishtirish va qayta ishlash tashkilotlari uyushmasi tashkil etildi.
 
Uning oldiga qator vazifalar qo‘yildi. Ular jumlasida: mazkur tarmoqni kompleks rivojlantirish dasturlarini amalga oshirishni muvofiqlashtirish, maxsus plantatsiyalar tashkil etish yo‘li bilan ularni yetishtirish hajmlarini oshirib borish (ularga 25 minggacha gektar ajratish rejalashtirilmoqda);  xorijiy sarmoyalarni, mutaxassislarni jalb etish va h.k, deb yozmoqda Norma.uz.
 
Qizilmiya va boshqa dorivor o‘simliklarni yetishtirish va qayta ishlash bilan shug‘ullanuvchi tashkilotlar uyushma a'zosi bo‘lishi mumkin.
 
Uyushma raisi va uning o‘rinbosarlari muassislarning umumiy yig‘ilishida saylanadi. Ular Vazirlar Mahkamasi tomonidan lavozimga tasdiqlanadi. Uyushmaning ijro etuvchi apparatini saqlash xarajatlari a'zolik badali va taqiqlanmagan boshqa manbalar hisobidan to‘lanadi.
 
Uyushma Qoraqalpog‘iston Respublikasi Nukus shahri, A.Utepov ko‘chasi, 31-uy manzilidagi Nukus maishiy xizmat ko‘rsatish va iqtisodiyot kasb-hunar kolleji binosiga joylashtiriladi.
 
Ushbu hujjat 1.02.2018 yildan kuchga kirdi.