Tramp Oq uyda KXDR fuqarolari bilan uchrashadi

AQSh prezidenti Donald Tramp Shimoliy Koreyadan qochib chiqib ketgan shaxslar bilan Oq uydagi Oval kabinetda uchrashuv o‘tkazadi. Bu haqda The Washington Post gazetasi yozmoqda.

Kutilishicha, KXDRning sakkiz fuqarosi bilan uchrashuv tashkillashtiriladi. Ulardan ikki nafari AQShda yashayotgan bo‘lsa, oltisi – Janubiy Koreyada.

Gazetaning ta'kidlashicha, bu uchrashuv Trampga Shimoliy Koreyada qurollar sinovi fonida keskinlik ortib borayotgan bir paytda ushbu mamlakatdagi inson huquqlarining buzilishi masalasini ko‘tarish imkonini beradi. 

«Hali hech bir rejim Shimoliy Koreyadagi shafqatsiz diktatura kabi o‘z fuqarolarini azob-uqubatga duchor qilmagan», - deya ma'lum qilgan Tramp kongressga har yillik murojaatida.

Gazeta manbasi so‘zlariga ko‘ra, uchrashuv AQShning Shimoliy Koreyadagi inson huquqlari bo‘yicha qo‘mitasi vakili Greg Skarlatu tomonidan tashkillashtirilgan.