Belgiyada Saloh Abdusalom ustidan sud boshlanmoqda

Bryusselda bugun 2015 yilgi Parij teraktlaridagi bosh ayblanuvchi Saloh Abdusalomga nisbatan sud jarayoni boshlanadi. Uni 2016 yilda qo‘lga olish paytida politsiyaga o‘t ochishda ishtirok etish uchun sud qilishadi. Avvaliga dastlabki yig‘ilish 2017 yilning 18 dekabriga belgilangandi, biroq unga bir necha kun qolganida sud boshqa sanani tayinladi.

Abdusalom yig‘ilishga Fransiyadan politsiya vertolyotida olib kelinadi. Bundan tashqari, birinchi instansiya sudi matbuot xizmatidan xabar berishlaricha, Adolat saroyi va uning atrofida "favqulodda xavfsizlik choralari" ko‘riladi. Yig‘ilish zalining o‘zida ikkita kamera o‘rnatilib, bu jurnalistlarga jarayonni boshqa xonadan kuzatish imkonini yaratadi.

Eslatib o‘tamiz, Parij va uning yaqinidagi teraktlar 2015 yilning 13 noyabr kuni ro‘y berdi. Jangarilar bir vaqtning o‘zida bir nechta hujumni amalga oshirishdi: Sen-Denidagi "Stad de Frans" stadioni yonida portlash, bir necha restoranlar mijozlari otib tashlandi, shuningdek, "Bataklan" konsert zalidagi fojia. O‘shanda hammasi bo‘lib 130 kishi halok bo‘ldi, 350dan ortiq inson jarohatlandi.

Abdusalom yetti terrorchidan biri bo‘lgan, biroq uning portlovchi qurilmasi ishga tushmagan, yoki o‘zi buni so‘nggi soniyada qilmagan. Teraktlar sodir etilganidan to mart oyiga qadar u Bryusseldagi do‘stlarinikida yashirinib kelgan.