O‘zbekistonda «aqlli qishloq»lar paydo bo‘ladi

2018 yilning uchinchi choragida mamlakatda “aqlli qishloq” (smart village) loyihasi sinov tarzda amalga oshirilishi mumkin, deb yozmoqda Norma.

Prezidentning “Hududlarda axborot-kommunikatsiya texnologiyalarini joriy etish va rivojlantirishni tubdan takomillashtirish to‘g‘risida”gi qarori loyihasi qonun hujjatlari ta'sirini baholash tizimi portalida umumiy muhokama uchun joylashtirilgan bo‘lib, unda shunday loyiha xususida so‘z boradi.

“Aqlli qishloq” muqobil manbalardan foydalangan holda o‘zini to‘laligicha energiya bilan ta'minlaydigan uylardan iborat bo‘ladi. Uylar shamol generatorlari, fotoelektr panellari, termonasoslar va boshqa uskunalar bilan jihozlanadi.

“Aqlli qishloq” konsepsiyasi, shuningdek, qishloq xo‘jaligi sohasiga zamonaviy raqamli texnologiyalarni faol tatbiq etishni ham ko‘zda tutadi.

Hujjatda “Aqlli qishloq” loyihasini Axborot texnologiyalari va kommunikatsiyalarini rivojlantirish vazirligi tomonidan Axborot-kommunikatsiya texnologiyalarini rivojlantirish jamg‘armasi va mahalliy byudjyet mablag‘lari hisobidan amalga oshirilishi taklif etilgan.