«Neftchi» yangi futbolchilarni tanishtirdi

28 fevral kuni Farg‘onaning «Neftchi» klubi yangi mavsum oldidan o‘z safiga qo‘shib olgan futbolchilarni keng jamoatchilikka rasman tanishtirdi.

Tanishtiruv marosimi Qirgulidagi «Neftchi» madaniyat saroyida o‘tkazildi. Unda «Neftchi» PFK rahbariyati, viloyat futbol federatsiyasi vakillari, murabbiylar, futbolchilar, jurnalistlar va klub muxlislari ishtirok etishdi. 

Tadbirda «Neftchi» tarkibiga kelib qo‘shilgan Vitaliy Mirniy (darvozabon, «Gornyak-sport» Ukraina), Farruh Turdaliyev  (darvozabon, «Tsementchi» Quvasoy), Davron Mamatov  (himoyachi, «Tsementchi» Quvasoy), Shukurali Po‘latov  (himoyachi, «Qizilqum» Navoiy), Avaz Agaliyev  (himoyachi, «Mash'al» Muborak), Jalil Kimsanov  (himoyachi, «Qo‘qon-1912» Qo‘qon), Iskandar Shaykulov (himoyachi, «Mash'al» Muborak), Elyor Mamasoliyev (yarimhimoyachi, «Tsementchi» Quvasoy), Abbosbek Maxstaliyev  (yarimhimoyachi, «Navbahor» Namangan), Sunnatillo Ermatov  (yarimhimoyachi, «Tsementchi» Quvasoy), Otabek Axmadjonov  (yarimhimoyachi, «Tsementchi» Quvasoy), Abdul Aziz Yusupov  (hujumchi, «Tsementchi» Quvasoy), Murodbek Bobojonov  (hujumchi, «Lokomotiv» Toshkent), Anvar Berdiyev  (hujumchi «Andijon» Andijon) va Vyacheslav Sushkinga (hujumchi, «Sparta» Gretsiya) klub futbolkalari topshirildi.

«Neftchi» bosh murabbiyi Sergey Kovshov joriy mavsumda jamoa chempionlik uchun kurashmoqchi ekanini ta'kidladi.

«Bu yil katta ishlarni amalga oshirmoqdamiz. Farg‘ona viloyati «Hokim Kubogi»da g‘olib bo‘lganimizdan so‘ng, Toshkent shahrida yig‘in o‘tkazdik.

«Neftchi»ning maqsadlari har doim yuqori bo‘lib kelgan. Biz yana avvalgi mavqemizni tiklash uchun, davrani kengroq olmoqdamiz. Oltinchi yoki yettinchi o‘rinlarni egallash ko‘p hollarda uchraydi. Lekin birinchi o‘rinni egallash har kimga ham nasib qilmaydi. Biz ham birinchi o‘rinni qo‘lga kiritishga harakat qilamiz» - dedi Kovshov.