Futbol boʻyicha Oʻzbekiston kubogi nimchorak finalidan oʻrin olgan ikkita bahs yakuniga yetdi.
Olmaliqda boʻlib oʻtgan “Surxon” – “Guliston” jamoalari uchrashuvi Asilbek Umirzaqovning 52-daqiqada urgan goli evaziga 0:1 hisobida tugadi.
Ushbu gʻalaba bilan “Guliston” Oʻzbekiston kubogi chorak finaliga chiqqan ilk Birinchi liga jamoasiga aylandi.
Kunning ikkinchi uchrashuvi Fargʻonada boʻlib oʻtdi. “Istiqlol” stadionida “Paxtakor”ni qabul qilgan “Neftchi” 1:0 hisobida gʻalaba qozondi. Mezbonlarning yagona goliga 81-daqiqada Stipe Peritsa mualliflik qildi.
30-avgust kuni yana ikkita bahs oʻtkaziladi. “Soʻgʻdiyona” “QMU Jayhun” bilan, “Navbahor” “Nasaf” bilan chorak final yoʻllanmasi uchun kurash olib boradi.
