Yevropaning kuchli beshlik chempionatlarida va Rossiyada haftaning so‘nggi kunlari ajoyib to‘qnashuvlar bo‘lib o‘tishi kutilmoqda. Tribuna.Uz an'anaviy ravishda eng muhim uchrashuvlarga batafsil to‘xtalib o‘tadi.
RB LeYPTsIG - BORUSSIYa DORTMUND (3 mart, 22:30)
Bugun Germaniyada Chempionlar Ligasi yo‘llanmasi uchun kurash yo‘lidagi muhim o‘yinlardan biri bo‘lib o‘tadi. Har ikki jamoa mavsumni YeChLda boshlashdi, lekin guruh o‘yinlari ular uchun omadsiz kechdi va har ikki klub ham kurashni Yevropa Ligasida davom ettirishmoqda.
O‘tgan yilning oxirlarida juda yomon o‘tkazgan dortmundliklar 2018 yilni yaxshi boshlashdi va hali bundesligada mag‘lubiyatga uchraganlari yo‘q. Ammo jamoaning duranglar bilan o‘ralashib qolgani ham bor gap: so‘nggi 7 o‘yinning 4 tasida «Borussiya» bir ochko bilan kifoyalanishga majbur bo‘ldi. Shunday bo‘lsa-da, yuqori o‘rinlardagi raqobatchilarning yanada muvaffaqiyatsiz o‘yinlari «Borussiya»ga qo‘l keldi va jamoa 41 ochko bilan ikkinchi o‘ringa ko‘tarilib oldi.
Misol uchun, «Leyptsig» bundesligadagi oxirgi ikki o‘yinda mag‘lubiyatga uchradi. Ayniqsa, turnir jadvalida so‘nggi pog‘onani egallab turgan «Kyoln»dan o‘z maydonidagi mag‘lubiyat jamoa uchun juda yomon natijadir. «Leyptsig» hozirda 38 ochko bilan 6-pog‘onani egallab turibdi. Demak bu o‘yindagi g‘alaba mezbonlarga ochkolar bo‘yicha raqibiga yetib olish imkonini beradi.
«Red Bull Arena»da jamoalar atigi bir marotaba ko‘ch sinashishgan va o‘sha o‘yinda mezbonlar 1:0 hisobida ustun kelishgandi. Ushbu mavsum doirasida Dortmundda, oktabr oyida bo‘lib o‘tgan o‘yin esa juda voqealarga boy va keskin kechgan. Muxlislar ikki qizil kartochka va ikki penalti guvohi bo‘lgan mazkur uchrashuvda «Leyptsig» 3:2 hisobida g‘alaba qozongandi.
LATsIO - YuVeNTUS (3 mart, 22:00)
Har hafta shu gapni takrorlashga majbur bo‘lmoqdamiz — kuchli beshlikda chempionlik intrigasi eng qizg‘in kechayotgan A Seriyada «Napoli» ham, «Yuventus» ham qoqilish haqida o‘ylashmayapti va o‘rtadagi bir ochkolik farq hamon saqlanib turibdi. «Yuventus» chempionatda qatorasiga 11 uchrashuvda g‘alaba qozondi, lekin bunday ajoyib seriya «Napoli» bilan o‘rtadagi farqni hech bo‘lmasa bir ochkoga qisqartira olmadi. Zero «Napoli» ham xuddi shunday seriyani amalga oshirishning uddasidan chiqmoqda.
Mavzuga oid
O‘tgan turda noqulay ob-havo tufayli maydonga tusha olmagan «Yuventus»ni bu safar og‘ir safar kutib turibdi.
Aslida «Latsio» turinliklar uchun u qadar noqulay ham emasdi, shu mavsumgacha «Yuventus» «Latsio»ni qatorasiga 7 o‘yinda mag‘lubiyatga uchratgan, besh yil oldin bo‘lib o‘tgan Italiya kubogi yarim finalidagi g‘alaba «Latsio» uchun oxirgisi bo‘lib kelayotgandi. Ammo so‘nggi o‘yinlarda rimliklar «Yuventus» bilan o‘ynashni o‘rganib olishdi. Avvaliga Italiya superkubogida «Latsio»ning qo‘li baland keldi. Oktyabr oyida Turinda bo‘lib o‘tgan chempionat o‘yinidagi dramatik holat esa, hammaning yodida bo‘lsa kerak. Mehmonlar 2:1 hisobida oldinga chiqib olgan, o‘yinning so‘nggi daqiqasida hakam «Latsio» darvozasiga penalti belgilagandi. Dibalaning zarbasini darvozabon qaytardi va o‘shanda «Yuventus» mavsumdagi ilk mag‘lubiyatini totib ko‘rgandi.
«Latsio»ga ham ochko juda kerak, jamoa «Inter» va «Roma» bilan birgalikda chempionlar ligasi yo‘llanmasi uchun jiddiy kurash olib bormoqda.
«Yuventus» tarkibida Iguain, Bernarderski va Kuadrado kabi yetachilarning maydonga qaytishlari so‘roq ostida turibdi. Turinliklar kelasi haftada YeChLda «Tottenhem» bilan o‘ta muhim o‘yinda maydonga tushishlariga e'tibor bersak, Allegri oldida bu futbolchilardan to‘liq foydalanish yoki yevrokubok bahsida yaxshiroq formaga kirishlarini kutish dilemmasi turibdi. Aytish mumkinki, «Yuventus»ning bir hafta ichida har ikki yirik turnirdagi ahvoli katta xavf ostida turibdi.
NAPOLI - ROMA (3 martdan 4 martga o‘tar kechasi, 00:45)
«Yuventus»ning raqibi ham bu turdagi ochkolarini hali cho‘ntagiga solgani yo‘q. Yuqorida aytilganidek, «Roma» hamshaharlari bilan YeChL yo‘llanmasi uchun kurash olib bormoqda.
O‘tgan turda kutilmaganda «Milan»ga imkoniyatni boy berib qo‘ygan «Roma»ning bu safar ochko yo‘qotishga haqqi yo‘q.
«Napoli» esa, ko‘pchilik kutganidek, Yevropa Ligasi kabi oyog‘iga tosh bo‘layotgan turnirdan tezda qutulib oldi. Taxmin qilish qiyin emaski, Sarri endi bor e'tiborini Skudettoga qaratadi. 1990 yildan buyon bu musobaqada g‘olib chiqa olmagan «Napoli» o‘tgan yilgi xatolarini takrorlamoqchi emasligi va barqarorlikda kimsan «Yuventus» bilan bellasha olayotgani tahsinga sazovor.
O‘zaro o‘yinlar borasida mutlaqo tenglikni kuzatishimiz mumkin. Jamoalar o‘rtasidagi so‘nggi 17 o‘yinning 8 tasida «Napoli», 7 tasida «Roma»ning qo‘li baland kelgan. Qizig‘i, so‘nggi uch o‘yinda mehmon jamoa g‘alaba qozonganiga ham e'tibor berish kerak.
Tarkib jihatidan «Roma»da muammo yo‘q. «Napoli»da esa, aprelgacha safdan chiqqan yetakchi himoyachi Fayzi G‘ulomdan tashqari, Marek Hamshikning ham maydonga tushishi so‘roq ostida turibdi. Slovakiyalik yarimhimoyachi shamollab qoldi va jamoaning so‘nggi mashg‘ulotlarini o‘tkazib yubordi.
ReAL - XeTAFe (3 martdan 4 martga o‘tar kechasi, 00:45)
O‘yin derbi maqomida bo‘lsa-da, «Xetafe» hech qachon «Real»ga munosib raqib bo‘la olmagan, statistikaga qarasak ham, jamoalar o‘rtasidagi so‘nggi 13 o‘yindagi atigi bir marotaba «Real» mag‘lubiyatga uchragan xolos. Ammo e'tirof etish kerakki, bir yil Segundada o‘ynab kelgan «Xetafe»ning bu safargi qaytishi ancha barqaror kechmoqda va doimo ligadagi o‘rni uchun qayg‘uradigan jamoa 26 turdan keyin to‘plar nisbati bo‘yicha ham, g‘alabalar nisbati bo‘yicha ham musbat farqqa ega bo‘lib turibdi. «Xetafe» 36 ochko bilan kuchli o‘nlikda bormoqda va yevrokubok o‘rinlaridan atigi 5 ochko ortda bormoqda, xolos.
«Xetafe» so‘nggi 10 o‘yinda atigi 2 marotaba mag‘lubiyatga uchradi, u ham bo‘lsa «Atletiko» va «Vilyareal» bilan safar o‘yinlarida. Hatto «Kamp Nou»dagi durang ham madridliklarning himoyada tartibli o‘ynay olishlarini ko‘rsatmoqda. Yana bir fakt, «Xetafe» gol o‘tkazish bo‘yicha La-Ligada 3-o‘rinda (22) boryapti — faqat «Barselona» va «Atletiko» kamroq gol o‘tkazgan xolos.
Tarkibda Marselo, Kroos, Modrich kabi yetakchilarning tushishi so‘roq ostida bo‘lgan va hujumchilar beqarorligi tufayli Zidan Garet Beylni ham markaziy hujumda sinab ko‘rib, ekperimentlar o‘tkazishga majbur bo‘lib qolayotgan bir paytda, «Xetafe»ni «chaqish» mezbonlarga oson bo‘lmasligi mumkin.
Boshqa tarafdan, Zidan chempionlik uchun kurash davom etayotganini takrorlayotgan bo‘lsa-da, bor e'tiborini uch kundan keyin bo‘lib o‘tadigan Parij safariga qaratishi va bu o‘yinda ham turli rotatsiyalarga yo‘l ochishi mumkin. Xullas, bu o‘yin «Real» uchun oson va oddiy kechmasligi haqiqatga yaqinroq.
LOKOMOTIV - SPARTAK (4 mart, 18:30)
Nihoyat Rossiya chempionatining bahorgi mavsumiga start berilmoqda va chempionlik uchun asosiy da'vogar bo‘lgan «Lokomotiv» o‘z maydonida asosiy raqibini qabul qiladi.
«Temiryo‘lchilar» asosiy ta'qibchilar bo‘lmish «Spartak» va «Zenit»ni 8 ochko ortda qoldirmoqda va mavsum tugashiga 10 tur bor. Bu o‘yindagi g‘alaba o‘rtadagi farqni saqlab qolishga va mezbonlarning keyingi turlarni ham ko‘tarinki ruhda o‘tkazishlariga zamin yaratsa, aksincha, mag‘lubiyat chempionlik intrigasini qaytadan uyg‘otishi mumkin.
Har ikki jamoa uchun bu o‘yin tanaffusdan keyingi ilk rasmiy o‘yin emas. «Spartak» ham, «Lokomotiv» ham Yevropa Ligasida o‘z o‘yinlarini o‘tkazishda. «Lokomotiv» «Nitstsa»ni ikki o‘yinda mag‘lubiyatga uchratgan bo‘lsa, «Spartak» «Atletik» qarshiligini yenga olmadi.
«Nitstsa»ga qarshi dastlabki o‘yinda maydonga tushgan o‘zbekistonlik Vitaliy Denisov raqibning yosh hujumchisi Santi Maksimen bilan duelda o‘ta muvaffaqiyatsiz harakat qilgan va uning xatolari bilan fransuzlar gollar urishgandi. Denisov birinchi taymdayoq almashtirildi va javob o‘yinida maydonga tushirilmadi. Balki bu murabbiyning aynan raqibga moslab tanlangan qarori bo‘lishi mumkin. Albatta, «Spartak»ka qarshi o‘yinda Denisovni kutib qolamiz.
Jamoalarning avgustda bo‘lib o‘tgan o‘yini juda qiziqarli kechganini eslatish kerak. Dastlabki daqiqalarda 2:0 hisobida oldinga chiqib olgan «Spartak» Samedovning qizil kartochkasidan so‘ng qiyin ahvolga tushib qolgan va 4 ta gol o‘tkazib yuborgandi. O‘yin «Lokomotiv»ning 4:3 hisobidagi g‘alabasi bilan tugagan.
BARSeLONA - ATLeTIKO (4 mart, 20:15)
«Barselona» muxlislari «Real» bilan o‘rtadagi farqning kattalashib borayotganini hisoblab yuraverib, ortdan «Atletiko»ning yaqinlashib qolganini sezmay qoldi chog‘i. Natijada, so‘nggi 10 o‘yinda qatorasiga g‘alaba qozongan Simeone shogirdlari «Barselona» bilan farqni besh ochkogacha qisqartirib olishdi.
Bu o‘yin madridliklar uchun ayni muddao bo‘lgan paytda o‘tkazilyaptimi yoki «Barselona» uchun farqni yanada oshirib, «tug‘ilayotgan» intrigaga barham berish imkoniyatimi, hozir aytish qiyin. Zero Valverde shogirdlari u qadar ishonchli ko‘rinishmayapti — so‘nggi sakkiz o‘yindan beri g‘alabalar duranglar bilan almashib turibdi, qatorasiga ikki o‘yinda g‘alaba qozonishning uddasidan chiqilmayapti. «Atletiko» esa, aksincha, yuqorida aytilganidek, juda yaxshi formaga kirib oldi. Jamoa yetakchi hujumchisi Antuan Grizmann mavsum boshida juda ko‘p tanqidlarga uchragan bo‘lsa, hozir ketma-ket gollar urishda davom etmoqda. Ayniqsa, hujumchining so‘nggi o‘yinidagi pokeridan so‘ng, Sereso Grizmanning «Barselona» darvozasiga ham bir nechta gol urishi mumkinlini haqida aytib yubordi.
Shunday bo‘lsa-da, «Atletiko» oradagi farqni yanada qisqartirish uchun bor-yo‘g‘i bilan oldinga tashlanishini kutish noo‘rin. Aksincha, eng muhim pallada o‘rtadagi farqning yanada oshib ketmasligi Simeone uchun muhim bo‘lsa kerak. Sababi, «Atletiko» istalgan paytda tark etishi mumkin bo‘lgan Yevropa Ligasida o‘ynamoqda. «Barselona» esa Yevropa Chempionlar Ligasiga ham ko‘proq e'tibor qaratishga majbur bo‘lib qoladi. «Atletiko» o‘zaro o‘yinda emas, aynan boshqa o‘yinlardagi barqarorlik evaziga raqibiga bosim o‘tkazishi osonroqdek ko‘rinmoqda. Ya'ni, jamoalarning «Kamp Nou»dagi so‘nggi 2 o‘yinida qayd etilgan hisob (1:1) madridliklar uchun juda ham yaxshi hisob sifatida qabul qilinishi haqiqatga yaqinroq.
Ikki kun muqaddam La-Ligada navbatdagi tur o‘yinlari bo‘lib o‘tdi. «Atletiko» raqibiga nisbatan bir kun oldin maydonga tushgani ertangi muhim o‘yin oldidan qo‘shimcha ustunlik yaratishi ham bor gap. MANCheSTeR SITI - CheLSI (4 mart, 21:00)
«Yana besh o‘yinda g‘alaba qozonsak, chempion bo‘lamiz», — dedi Pep Gvardiola. Ispaniyalik murabbiyning ichki chempionatda barchasini hal qilishga shoshilayotganini tushunsa bo‘ladi. YeChLda nimchorak finalni dastlabki o‘yinda hal qilgan va Angliya Liga kubogini muzeyiga joylashga ulgurgan «Manchester Siti» bahorda butun diqqatini Chempionlar Ligasida g‘alaba qozonishga qaratishi mantiqan to‘g‘ri. «Chelsi» esa, bir she'rda aytilganidek - «uning aybi bo‘rining och bo‘lib qolganida qarshisiga chiqqanidir».
«Barselona» bilan o‘yinda ham, o‘tgan turda «Old Trafford»da ham Villianning goli «Chelsi»ni hisobda oldinga olib chiqqan bo‘lsa-da, g‘alaba ushlab qolinmadi. Natijada, ayniqsa, APLdagi holat yanada chigallashdi. Endi «Chelsi» ligada beshinchi o‘ringa tushib ketdi. Bu turda «Liverpul» va «Tottenhem» o‘z maydonida mos ravishda «Nyukasl» va «Haddersfild»ni qabul qilishsa, «Manchester Yunayted»ga «Kristal Pelas» raqib bo‘ladi. Ya'ni «Chelsi» bu safar ham ochko yo‘qotsa, kuchli to‘rtlik kurashidagi asosiy raqobatchilaridan yanayam orqada qolib ketishi mumkin. Demak, qanday sharoitda va qaysi stadionda o‘yin bo‘layotganidan qat'i nazar «Chelsi» ham g‘alaba uchun maydonga tushishga majbur.
Optmistik qarashlar uchun ham sabablar topsa bo‘ladi, albatta. Masalan, Premer-liga doirasida «Etihad» bo‘lib o‘tgan so‘nggi 4 o‘yinning atigi 1 tasida mezbonlar g‘alaba qozonishgan. Ikki marta, jumladan, o‘tgan mavsumdagi o‘yinda ham Konte jamoasining qo‘li baland kelgan. Ikkinchidan, «Manchester Siti» payshanba oqshomida «Arsenal»ga qarshi maydonga tushdi. «Chelsi» esa, o‘yin oldidan bir haftalik tanaffusga ega bo‘ldi. «Shaharliklar» Venger jamoasini osonlik bilan mag‘lubiyatga uchratishgandek ko‘rinsa-da, baribir top-o‘yinga jalb qilingan diqqat va e'tibor, tartibli o‘ynash zaruriyati futbolchilarni charchatishi turgan gap.
MILAN - INTeR (4 martdan 5 martga o‘tar kechasi, 00:45)
Juda ko‘p markaziy uchrashuvlarga boy ushbu haftani Milan derbisi yakunlab beradi. «Milan»ning so‘nggi oylardagi ajoyib natijalari va «Inter»ning YeChL o‘rinlari uchun qizg‘in kurash ostida ekani o‘yin ahamiyatini yanada bir pog‘ona yuqoriga ko‘taradi.
Gattuzo boshchiligida «Milan» 13 o‘yindan beri mag‘lubiyat nimaligini bilmay kelmoqda. Bu o‘yinlarning 9 tasida g‘alaba qozongan «Milan» Italiya kubogi finaliga chiqdi, Yevropa Ligasida keyingi bosqichda kurashni davom ettiradigan bo‘ldi va A Seriyada 7-pog‘onaga ko‘tarilib, «Inter» bilan oradagi farqni 7 ochkogacha qisqartirdi. Ya'ni, shu alfozda ketilsa, kim biladi, «Milan» nafaqat yevrokuboklar, balki aynan Chempionlar Ligasi yo‘llanmasi uchun ham kurashga qo‘shilishi mumkin. O‘tgan turda boshqa bir yetakchi «Roma» safarda mag‘lub etilganini e'tiborga olsak, milanliklarni to‘xtatib qolish oson emas hozir.
Nafaqat g‘alaba qozonish, balki «Milan» bu ishni juda ishonch bilan amalga oshirishni ham uddalamoqda. Gattuzo shogirdlari so‘nggi 6 o‘yinda o‘z davrozalaridan birorta ham gol o‘tkazib yubormayapti va qaysidir ma'noda bu jihatdan mavsum boshidagi «Inter»ni ham eslatmoqda.
«Inter» esa, aksincha, qatorasiga 10 o‘yinda g‘alaba qozona olmadi va o‘sha o‘yinlarning yettitasida durangga rozi bo‘ldi. Faqat so‘nggi turlarda ikkita o‘yinda yutib, ahvolini biroz o‘nglay oldi xolos. Bu o‘yindagi mag‘lubiyat «Inter»ni kuchli to‘rtlikning tashqarisiga uloqtirishi mumkin.
Birinchi davradagi o‘yinda «Inter» kichik hisobda g‘alaba qozongandi. Ammo bu jamoalar o‘rtasidagi so‘nggi uchrashuv 28 dekabrda Italiya kubogi doirasida bo‘lib o‘tgan va bu uchrashuvda «Milan» 1:0 hisobida ustun keldi. Aynan shu g‘alaba «Milan»ning bu mavsumdagi ilk katta yutug‘i bo‘lgandi.
BOShQA O‘YINLAR:
3 mart: TOTTeNHEM - Haddersfild (20:00), Trua - PSJ (21:00), LIVeRPUL - Nyukasl (21:30)
4 mart: Brayton - ARSeNAL (18:30), Frayburg - BAVARIYa (22:0
5 martdan 6 martga o‘tar kechasi: Kristal Pelas - MANCheSTeR YuNAYTeD (01:00)
