Ayrim AYoQShlar xususiy shaxslarga ijaraga beriladi

Vazirlar Mahkamasining 28.02.2018 yildagi 149-son qarori bilan dizel yonilg‘isi va EKO dizel yonilg‘isining yagona chakana narxlariga tegishli o‘zgartirishlar kiritilgani xabar berilgandi.

Ma'lum qilinishicha, 1 martdan boshlab 1 litr dizel yoqilg‘isi 4 ming 600 so‘m (12,1 foizga oshgan), EKO dizel yoqilg‘isining 1 litr uchun narxi esa 4 ming 700 so‘m etib belgilandi. (11,9 foizga oshgan)

Hujjatda aytilishicha, yuqorida belgilangan narx bo‘yicha dizel yoqilg‘isini sotish to‘g‘ridan-to‘g‘ri shartnomalar orqali amalga oshiriladi. Shuningdek, qishloq xo‘jaligi ishlab chiqaruvchilari ham avtomobillarga yoqilg‘i quyish shoxobchalariga dizel yoqilg‘i barcha soliqlar bilan belgilangan yagona narx bo‘yicha yetkazib beriladi.

Norma.uz xabariga ko‘ra, fermer xo‘jaliklariga xizmat ko‘rsatuvchi avtomobillarga yonilg‘i quyish shoxobchalari tadbirkorlik sub'yektlariga uzoq muddatli ijaraga bosqichma-bosqich beriladi. Bu davlat-xususiy sheriklik shartlari hamda xususiy shaxslarning qishloq xo‘jaligi mahsulotlari yetishtiruvchilarga neft mahsulotlarini sotishi asosida amalga oshiriladi. 

Ushbu avtomobillarga yonilg‘i quyish shoxobchalari fermer xo‘jaliklariga xizmat ko‘rsatish uchun dizel yonilg‘isini ularning haqiqiy xarajatlari va rentabellikni ta'minlashidan kelib chiqqan holda belgilanadigan chegirmalarni hisobga olib, neft bazalari bilan to‘g‘ridan-to‘g‘ri shartnomalar bo‘yicha sotib olishlari mumkin bo‘ladi.