Haqiqat sudda aniqlandi

Jinoyat ishlari bo‘yicha Surxondaryo viloyati Qumqo‘rg‘on tuman sudi O‘zbekiston Respublikasi JKning 167-moddasi 2-qismi “v”, “g” bandlari va 209-moddasi 1-qismi bilan ayblangan P.Tursagatov va B.Xaitov nisbatan jinoyat ishini ko‘rib chiqdi, deb xabar bermoqda O‘zbekiston Respublikasi Oliy sudi rasmiy vakili Aziz Obidov.

Tergov organi Qumqo‘rg‘on tumani 41-sonli o‘rta ta'lim maktabi direktori P.Tursagatov va uning o‘rinbosari B.Xaitovlarni 2010-2011 yillarda 12.476.926 so‘m byudjyet mablag‘larini maktab o‘qituvchilariga, farroshlariga ortiqcha ish haqi sifatida to‘lab talon-toroj qilishda ayblagan.

Sudda P.Tursagatov va B.Xaitov to‘lovlar tegishli hujjatlar asosida amalga oshirilganini aytishib, odilona qaror qabul qilishni so‘rashgan.

Sud byudjyet mablag‘lari talon-toroj qilinganligi yuzasidan qarama-qarshiliklarni ekspertizasi tayinlash yo‘li bilan bartaraf etish maqsadida sud iqtisodiy buxgalteriya ekspertizasi tayinlagan.

X.Sulaymonova nomidagi Respublika sud ekspertiza markazining xulosasida maktabda o‘tkazilgan tekshirish hujjatlar bilan to‘liq tasdiqlanmagani, uslubiy jihatdan asoslantirilmagani, to‘g‘ri rasmiylashtirilmagani ko‘rsatilib, aybnomadagi 12.476.926 so‘mlik byudjyet mablag‘laridan  faqat 4.344.038 so‘m ish haqi ortiqcha to‘langani ko‘rsatilgan.

Shuningdek, tekshirish kuchini yo‘qotgan metodik ko‘rsatmadan asossiz foydalanilgani,  2016 yilda qabul qilingan me'yoriy hujjatlarni 2011-2012 yillarda sodir etilgan harakatlarga nisbatan tatbiq etib bo‘lmasligi qayd etilgan.

4.890.062 so‘m mablag‘ summasi rastrata qilganlik jinoyati tarkibini tashkil qiluvchi ayb summasi, ya'ni 2017 yil 1 dekabrdan o‘rnatilgan eng kam ish haqining o‘ttiz baravari - 5.167.200 so‘mdan kam bo‘lgan.

Sudning yakuniy majlisi 2018 yil 27 fevral kuni sayyor tartibida 41-sonli maktab binosida o‘tkazilib, sud P.Tursagatov va B.Xaitovlarni harakatlarida jinoyat tarkibi bo‘lmaganligi sababli oqlash to‘g‘risida hukm chiqardi.

P.Tursagatov va B.Xaitovni O‘zbekiston Respublikasi MJtKning 61-moddasi bilan ma'muriy javobgarlikka tortish masalasini hal qilish uchun tegishli hujjatlar alohida ish yurituviga ajratildi.