Toshkent viloyatida qoyadan qulagan fuqaro qutqarildi

Joriy yilning 18 mart kuni Favqulodda vaziyatlar vazirligining «Tezkor raqamiga» Toshkent viloyati Bo‘stonliq tumani Uchbov qishlog‘ida istiqomat qiluvchi fuqaro tog‘li hududda yo‘qolib qolganligi to‘g‘risidagi murojaat kelib tushadi, deb xabar bermoqda FVV axborot xizmati.

Shundan so‘ng, «Chimyon» qutqaruv otryadi qutqaruvchilari U.Kuliyev, D.Ochilov, F.Abdiyev va I.Mirzaaxmedovlar voqea joyiga zudlik bilan yetib borib, qidiruv ishlarini amalga oshirdilar. Natijada, qutqaruvchilar tana qismiga ko‘plab jarohat yetgan fuqaroni topishga muvaffaq bo‘lishdi. 

Aniqlanishicha, jabrlangan fuqaro tog‘yon bag‘rida sayr qilish jarayonida ehtiyotsizlik tufayli sirpanib ketib, taxminan 4 metr balandlikdan qulab tushgan. Buning oqibatida, o‘ng oyog‘ida ochiq sinish, o‘ng qo‘li va chap oyog‘ida sinish holatlari, shuningdek, bosh qismida ham jarohat kuzatilgan.

O‘z vaqtida yordamga kelgan qutqaruvchilar tezda jabrlangan fuqaroga birinchi tibbiy yordam ko‘rsatish bilan birga uni xavfsiz hududga evakuatsiya qilishadi hamda tez yordam xodimlariga topshirdilar. Hozirgi vaqtda jabrlanuvchining ahvoli – o‘rta darajada.