Aktsiyadorlik jamiyati ustav fondining eng kam miqdori 16 baravar kamaytiriladi

Davlat raqobat qo‘mitasi aksiyadorlik jamiyatlarini tashkil etish va ularning samaradorligi, shuningdek fond bozorini rivojlantirish masalalari bo‘yicha hujjatlar loyihalarini ishlab chiqdi. Loyihalar QHTBT portalida muhokama qilinmoqda. Undan keyin esa 2018 yilda amalga oshirilishi rejalashtirilayotgan chora-tadbirlar keltirib o‘tilgan, deb yozmoqda Norma.

Rivojlanishga to‘sqinlik qilayotgan omillar bartaraf etiladi

Ustav fondining eng kam miqdorini hozirgi 1 600 mln so‘mdan 100 mln so‘mgacha, ya'ni 16 baravar kamaytirish taklif etilmoqda. Bunda xorijiy investorning AJ ustav kapitalidagi, bugungi kunda kamida 15%ni tashkil etishi kerak bo‘lgan majburiy ulushi to‘g‘risidagi talabni bekor qilmoqchilar.

Yirik aksiyadorlar – AJdagi 25%dan ortiq ulush egalariga dividendlar faqat minoritar aksiyadorlar oldida dividendlar bo‘yicha qarzdorlik bo‘lmaganda to‘lanadi, dividendlar to‘lash uchun bank rekvizitlari bo‘lmaganlar bundan mustasno (1 maydan boshlab).

Quyidagilarni ham bekor qilish taklif etilmoqda:

AJdagi davlat ulushlarini boshqarish bo‘yicha davlat ishonchli vakillarini tayinlash amaliyotini. Ularning vazifalarini davlat ulushi bo‘yicha belgilangan tartibda tayinlanadigan kuzatuv kengashlari a'zolariga topshirish taklif etilmoqda;

qimmatli qog‘ozlar chiqarilganini tan olish uchun tashkil etilgan savdolarda joylashtiriladigan aksiyalar va boshqa emissiyaviy qimmatli qog‘ozlarning eng kam hajmiga doir talablarni;

ustav kapitalida davlat aksiyalari (ulushlari) paketi 50%dan ortiq bo‘lgan korxonalarda tashqi audit o‘tkazish uchun har yili auditorlik tashkilotlari ro‘yxatini tuzishga doir talablarni.

1 iyuldan joriy etiladigan yangiliklar

1) Emissiyaviy qimmatli qog‘ozlarni chiqarishni davlat ro‘yxatidan o‘tkazishga arizani ko‘rib chiqish muddatini 30 kundan 20 kunga qisqartirish taklif etilmoqda.

2) AJlar nominal qiymatga ega yoki unga ega bo‘lmagan aksiyalarni chiqara oladilar. Foydani qayta investitsiya qilish (kapitallashtirish) va qo‘shimcha kapital hisobiga aksiyadorlar o‘rtasida mutanosib ravishda joylashtiriladigan qo‘shimcha aksiyalarni chiqarish vositasida ustav kapitali ko‘paytiriladi.   
 
3) Davlat aksiyalari paketlari mayda lotlar orqali sotiladi, shu jumladan bitta lot – bitta aksiya, mamlakatimiz Hukumati tomonidan belgilangan alohida holatlar bundan mustasno.

1 avgustdan joriy etiladigan yangiliklar

1) Aktsiyadorlarning umumiy yig‘ilishlarida ishtirok etish va ovoz berish veb-saytda ovoz berish uchun byulletenlarning elektron shakllarini to‘ldirish yo‘li bilan amalga oshirilishi mumkin.

2) AJ taftish komissiyasi a'zolari, AJ kuzatuv kengashi a'zolarini saylash uchun nazarda tutilganidek, kumulyativ ovoz berish yo‘li bilan saylanadi.

Ma'lumot uchun: kumulyativ ovoz berishda har bir aksiyadorga tegishli ovozlar soni jamiyatning kuzatuv kengashiga saylanishi lozim bo‘lgan shaxslar soniga ko‘paytiriladi va aksiyador shu tariqa olingan ovozlarni bitta nomzodga to‘liq berishga yoki ularni ikki va undan ortiq nomzodlar o‘rtasida taqsimlashga haqlidir. Eng ko‘p ovoz to‘plagan nomzod saylangan deb hisoblanadi.

3) AJ qimmatli qog‘ozlarini birja kotirovka varag‘iga kiritish to‘g‘risida ariza berish va undan ixtiyoriy ravishda chiqarish to‘g‘risidagi qarorni jamiyat kuzatuv kengashi qabul qiladi.

4) Aktsiyadorlarning umumiy yig‘ilishini o‘tkazish to‘g‘risidagi va unda qabul qilingan qarorlar to‘g‘risidagi axborotni oshkor qilmaslik yoxud oshkor qilishning belgilangan tartibini buzish sud tomonidan ushbu qarorlarni haqiqiy emas deb topish yoki ularni bekor qilish uchun asos bo‘ladi. AJ qarorlarini haqiqiy emas deb topish to‘g‘risidagi nizolarni ko‘rishda sudlarga ana shunday pozitsiyani egallash topshirilgan.

Hisobot – portalda

Loyihalarga ko‘ra quyidagilar Yagona korporativ axborot portali orqali amalga oshiriladi:

• aksiyalari birja kotirovka varag‘ida bo‘lgan va birja savdolariga qo‘yilgan aksiyadorlik jamiyatlarining XMHSga muvofiq yillik moliyaviy hisobotni majburiy e'lon qilishi (1 maydan boshlab);
• choraklik va yillik hisobotlar, shuningdek AJ faoliyatidagi muhim faktlarning markazlashtirilgan tartibda e'lon qilinishi (1 iyuldan boshlab);
• jamiyat ustav kapitalining jami 20% va undan ortig‘ini tashkil etuvchi AJ aksiyalarining bir yoki bir nechta bitimni amalga oshirish natijasida mustaqil ravishda yoki affillangan shaxslar bilan birga sotib olinganligi to‘g‘risidagi axborotning oshkor etilishi (u ham 1 iyuldan boshlab).

Farmon va qaror loyihalari o‘zgartirilishi, ularga qo‘shimcha kiritilishi yoki rad etilishi mumkin.