Jinoyat ishlari bo‘yicha Namangan viloyati Pop tuman sudi “Umid” mahalla fuqarolar yig‘ini binosida ochiq sayyor sud majlisida Rahmatullo Jo‘rayevga nisbatan jinoyat ishini ko‘rib chiqdi va u oqlandi. Sud tajribasida tobora ko‘payib borayotgan bunday voqeaning tafsiloti quyidagicha yuz bergan. Sud hujjatlariga ko‘ra, R. Jo‘rayev Namangan viloyat IIB HOOB odamlardan foydalanish uchun ularni yollash bilan bog‘liq va axloq-odob doirasidagi huquqbuzarliklarni oldini olish bo‘linmasi inspektori lavozimida ishlagan.
O‘zbekiston Respublikasi Oliy sudi rasmiy vakili Aziz Obidovning Kun.uz muxbiriga ma'lum qilishicha, Jo‘rayev O‘zbekiston Respublikasi Jinoyat kodeksi 210-moddasi 3-qismining «b» bandi bilan ayblangan.
Dastlabki tergov organi tomonidan sudlanuvchi mas'ul lavozimda ishlab kelib, 2013 yil yanvar oyi boshlarida viloyat IIBda norasmiy ravishda ish o‘rganishda yurgan D. Abdurahmonov va shahar IIB bo‘limi inspektori F. Najmiddinov bilan jinoiy til biriktirib “qo‘shmachi” sifatida profilaktik hisobda turgan M. Sharipovani xonadoniga kelishib “Omina”, “Guli” laqabli va Setora ismli qizlarni R. Jo‘rayev o‘zining uyali telefon apparatida videotasvirga olayotgan vaqtda, D. Abdurahmonov qizlarni televideniyega chiqarmaslik va ularni sharmanda qilmaslik evaziga tamagirlik yo‘li bilan 100.000 so‘m berishini talab qilganida M. Sharipova 50.000 so‘m pullarni R. Jo‘rayevga yetkazish uchun D. Abdurahmonovga pora tariqasida berib, kelishilgan pullarni qolgan 50.000 so‘mini keyinroq berishini aytganidan so‘ng xodimlar xonadondan chiqib ketishgan.
Oradan bir soatlar o‘tib M. Sharipova tanishining “Matiz” rusumli avtomashinasida aytilgan manzilga borib, D. Abdurahmonov ishtirokida R. Jo‘rayevga 50.000 so‘m pullarni pora tariqasida olgani ko‘rsatilgan.
Sudlanuvchi Rahmatullo Jo‘rayev sud muhokamasida aybiga iqror bo‘lmagan.
Sud taraflarni, barcha guvohlarni, shuningdek bir nechta qo‘shimcha guvohlarni so‘roq qilib, yig‘ilgan dalillarni va ish holatlarini atroflicha o‘rganib chiqib, dastlabki tergov organi tomonidan sudlanuvchi R. Jo‘rayevning harakati O‘zbekiston Respublikasi Jinoyat kodeksi 210-moddasi 3-qismining «b» bandi bilan yetarli dalillarsiz, asossiz kvalifikatsiya qilinib, faqatgina ayblash yuzasidan bir tomonlama tergov harakatlari o‘tkazilib, xatolikka yo‘l qo‘yilgan deb, topdi.
Sud majlisida aniqlangan holatlarga ko‘ra R. Jo‘rayev 2013 yil 7 yanvar kunidan boshlab 11 fevral kunigacha O‘zbekiston Respublikasi IIV Akademiyasi dala o‘quv mashg‘ulotida guruh rahbari sifatida bo‘lgan, poligon hududidan tashqariga chiqmagan, buni xususan o‘sha vaqtda u bilan birga o‘qishda bo‘lgan Namangan viloyatidan 43 nafar IIB xodimlari tasdiqlaydi.
Jabrlanuvchi deb topilgan M. Sharipova sud muhokamasida voqea sanasi, pullarni kimlardan olgani, qachon va qayerda bergani to‘g‘risida qarama-qarshi ko‘rsatmalar bergan, ularni bir necha marta o‘zgartirgan. Uning ko‘rsatmalari guvohlar tomonidan inkor qilingan.
Go‘yoki u kuni R. Jo‘rayev videoga tushirgan, porani berilishida qatnashgan guvohlar R. Jo‘rayevni umuman ko‘rmagani va uni tanimasligini, o‘sha vaqtda M. Sharipova tergovda ko‘rsatma berishni so‘raganligini bildirgan.
Sudda R. Jo‘rayevning M. Sharipovadan pul olganligini tasdiqlovchi M. Sharipovaning ko‘rsatmasidan tashqari biror-bir boshqa obektiv dalil aniqlanmadi.
Yuqoridagilarga ko‘ra, sudlanuvchi R. Jo‘rayev O‘zbekiston Respublikasi Jinoyat kodeksining 210-moddasi 3-qismi «b» bandi bilan aybsiz deb topilib, ushbu modda bilan oqlandi.
