«Hech kim chidab o‘tirmaydi». Mey Poroshenkoga rossiyalik diplomatlar uchun minnatdorlik bildirdi

Britaniya bosh vaziri Tereza Mey Ukraina prezidentiga mamlakatdan rossiyalik 13 diplomat chiqarib yuborilgani uchun minnatdorlik bildirdi va bu harakat davlat rahbariyati kollektiv xavfsizlik manfaatlariga sodiq ekanidan darak berishini aytdi. Bu haqda RIA «Novosti» xabar qilmoqda.

«Bosh vazir prezident Poroshenkoga Ukraina tomonidan taqdim etilgan qo‘llab-quvvatlov va rossiyalik 13 diplomat chiqarib yuborilgani uchun minnatdorlik izhor qildi. Uning ta'kidlashicha, bu nafaqat Buyuk Britaniya bilan birdamlikning kuchli ko‘rinishi, balki bizning kollektiv xavfsizligimizga sodiqlik namunasi. Bosh vazirning qayd etishicha, Solsberidagi hodisaga xalqaro reaksiyaning ko‘lami Rossiyaga aniq signal berdi – endi uning dushmanlik harakatlariga hech kim chidab o‘tirmaydi», - deya ma'lum qilgan Mey ofisi vakili.

Ta'kidlanishicha, Mey Ukrainaning qo‘llab-quvvatlanishi G‘arb reaksiyasidagi muhim element ekanini aytgan.