Chernogoriyada prezidentlik saylovi boshlandi

Mahalliy vaqt bilan soat 07:00da Chernogoriyada saylov uchastkalari ochildi va saylovchilar mamlakat prezidentini saylash uchun kela boshlashdi. Mamlakatda jami bo‘lib 1214ta saylov uchastkasi ochilgan.

Davlat saylov komissiyasi hisoblariga ko‘ra, mamlakatning 532 mingdan ortiq fuqarosi saylov huquqiga ega hisoblanadi. Saylov jarayoni bir qator nodavlat tashkilotlar tomonidan kuzatib borilmoqda.

Prezidentlik uchun 7 nomzod kurash olib bormoqda. Bular: Marko Milachich, Mladen Boyanich, Xazbiya Kalach, Vasiliye Milichkovich, Dobrilo Dedeyich, Milo Jukanovich va yagona ayol nomzod Draginya Vuksanovich. 

Saylovda mamlakatning eng mashhur siyosatchisi 56 yoshli Milo Jukanovich favorit hisoblanadi. Mutaxassislarning fikricha, siyosatchi saylovlarning 1-bosqichidayoq 50 foizdan ko‘proq ovoz to‘play oladi.

Sobiq Yugoslaviya davlatlari ichidagi eng kichigi bo‘lmish Chernogoriyada ko‘p partiyali tizim kiritilgan 1990 yildan keyin yettinchi marta prezident tanlanadi. 

Amaldagi prezident Filip Vuyanovich mamlakatni 15 yil boshqargandan so‘ng vakolatlarini topshirmoqda. Chernogoriyada prezident 5 yillik muddatga saylanadi va bu lavozimni qatorasiga 2 martadan ko‘p egallay olmaydi. Biroq 2003 yilda birinchi marta prezident etib saylangan Vuyanovich bilan vaziyat o‘zgacha bo‘lgan. Chernogoriya 2006 yilda Serbiya va Chernogoriya ittifoqidan chiqib, mustaqilligini e'lon qilgandan keyin Vuyanovich mandati boshqatdan hisoblangan.