Toshkent shahridagi bozorlarda reyd o‘tkaziladi

Toshkent shahri hududida yoz yaqinlashishi bilan belgilanmagan joylarda nostandart hajmdagi idishlarda turli ichimliklarni sotish, sanitariya talablariga javob bermaydigan qishloq xo‘jaligi mahsulotlari, xususan, meva-sabzavotlar, chorva mollari va parranda go‘shtlarining noqonuniy savdosi bilan shug‘ullanish holatlari ko‘payib ketadi.

Toshkent shahri hokimligi matbuot xizmati bergan xabarga ko‘ra, bunday holatlarning oldini olish va aholi dasturxoniga sifatli oziq-ovkat mahsulotlarini yetkazish maqsadida Toshkent shahar hokimining «Toshkent shahri hududida noqonuniy savdolarni bartaraf etish, mavsumiy savdo va umumiy ovqatlanish tarmog‘i obektlari faoliyatini tartibga solish chora-tadbirlari to‘g‘risida»gi  №613–sonli qarori e'lon qilingan. Mazkur qarorning ijrosini ta'minlash maqsadida 2018 yilning 1 may kunidan boshlab poytaxtdagi dehqon bozorlari, savdo komplekslari va ixtisoslashtirilgan bozorlar hududida, sanitariya talablariga javob bermaydigan joylarda oziq-ovqat va nooziq-ovqat mahsulotlari, salqin ichimliklar, turli taomlar bilan noqonuniy savdo qilish holatlariga chek qo‘yiladi.

Bozorlar va uning hududida faoliyat yuritayotgan tadbirkorlar va ishchi-xizmatchilarning tibbiy ko‘rikdan o‘tganligi, maxsus ish kiyimlari bilan ta'minlanganligi, mahsulotlarni saqlash va sotish qoidalariga rioya qilinishi, ish joylarining sanitariya holatiga to‘liq javob berilishi nazoratga olinadi. Shuningdek, dehqon bozorlari va shoxobchalari hududida go‘sht, sut, parranda tuxumi, salat va qandolat mahsulotlari savdosi amalga oshiriladigan rastalarda sovutgich uskunalari bo‘lishi va doimiy ishlashi yuzasidan tekshiruvlar olib boriladi.

Qabul qilingan qarorga muvofiq Toshkent shahar hokimi tuman hokimlari zimmasiga: tuman hududida mavsumiy savdolarni tartibga solish hamda aholi salomatligini himoya qilish maqsadida ko‘chma savdo bilan shug‘ullanish istagini bildirgan tadbirkorlik sub'yektlariga ruxsat berishda O‘zbekiston Respublikasi Vazirlar Mahkamasining 2016 yil 13 iyuldagi «Ko‘chma savdoga ruxsat berish tartibi to‘g‘risidagi nizomni tasdiqlash haqida»gi №233–sonli qaroriga qat'iy rioya qilish talabini qo‘ygan.