OAVni qo‘llab-quvvatlash jamoat fondi onlayn-nashrlar bilan hamkorlikni kuchaytiradi

O‘zbekiston OAVni qo‘llab-quvvatlash jamoat fondi internet nashrlar bilan hamkorlikni mustahkamlashga alohida e'tibor qaratmoqda. Fond rahbari Said-Abdulaziz Yusupovning KUN.UZ muxbiriga ma'lum qilishicha, hozirda onlayn-nashrlar bilan hamkorlikka doir qator loyihalar tasdiqlanishi kutilmoqda. 

"Biz hozir uch onlayn-nashr bilan hamkorlikda ishlayapmiz va Vazirlar Mahkamasi tomonidan katta bir loyihaning tasdiqlanishini kutyapmiz. Bu yo‘nalishda bir necha loyihalar tayyorladik va ularning bari moliyaviy masalalarga bog‘liq. Bizning moliyalashtirish manbalarimiz asosan Oliy Majlis fondi subsidiyasi hisobidan amalga oshirib kelingan. Shunday bo‘lsa-da, 2018-2020 yillar uchun tayyorlangan konsepsiyaga ko‘ra, 2020 yilga borib Fondning to‘liq o‘zini o‘zi moliyalashtirish darajasiga erishish rejalashtirilgan". 

Bundan tashqari, O‘zbekiston OAVni qo‘llab-quvvatlash jamoat fondi rahbari KUN.UZ muxbirining OAV uchun o‘tkaziladigan tadbirlarga yangicha yondashuv haqidagi savoliga javoban ayni damda bu yo‘nalishda ishlar boshlab yuborilganini ma'lum qilib, yaqin kunlarda bo‘lishi kutilayotgan yangicha yo‘nalishdagi tadbirlardan biriga jurnalistlarni taklif qildi. 

"Ommaviy axborot vositalari uchun o‘tkaziladigan tadbirlarga yangicha yondashish kerakligiga doir fikringizga qo‘shilaman. Fursatdan foydalanib, yaqinda tog‘ yonbag‘rida bo‘lib o‘tadigan seminarga sizlarni taklif qilaman, borib ko‘ringlar. O‘zgartirish qila olibmizmi yoki yo‘q. Jurnalist sifatida sizlarning fikrlaringiz biz uchun muhim", - dedi Said-Abdulaziz Yusupov. 

Yusupov shuningdek yaqin kelajakda Milliy axborot armiyasi, Milliy blogerlar armiyasini tuzish tashabbusini bildirdi.