Bangkokda boks bo‘yicha yoshlar o‘rtasida Osiyo chempionatida kecha finaldagi barcha janglar yakuniga yetdi. Unda -56 kg vazn toifasida yurtimiz sharafini himoya qilgan Abdumalik Xalakov tailandlik bokschini mag‘lub etib, Osiyo chempioniga aylandi.
Samandar Xolmurodov (-52kg), Timur Merjanov (-81kg), Javohir Tog‘aymurodov (-91kg) va Jamshidbek Mahmadaliyev (+91kg) esa finalda kumush medalni qo‘lga kiritdi. Jahongir Rahmonov (-69kg) va Navo Tamazov (-75kg) musobaqaning bronza medali bilan yurtimizga qaytadigan bo‘ldi.
Qizlar o‘rtasidagi janglarda Mahliyo Rahimova (-60kg) bronza medali sohibasiga aylandi.
Shu tariqa, O‘zbekiston terma jamoasi yoshlar o‘rtasidagi Osiyo chempionatida 1ta oltin, 4ta kumush va 3ta bronza medallarini qo‘lga kiritdi.