«Real»ning raqibi kim bo‘ladi? Ikkinchi yarim final haqida

Kechagi og‘ir vazndagi jangdan keyin bugun o‘rta vaznli jamoalar o‘rtasida yarim final o‘yinlari bo‘lib o‘tadi. «Roma» va «Liverpul» madridliklarning qetma-ket uchinchi g‘alabasiga kim to‘sqin bo‘la olishiga oydinlik kiritadilar.

«Roma»ning «Barselona» ustidan g‘alabasidan so‘ng, «Enfild»dagi 2:5 dan keyin ham mezbonlarda imkoniyat qolgani haqida ko‘pchilik gapirmoqda. Bu holatga ikki tomonlama yondoshish mumkin. Birinchidan, Kloppning gapi to‘g‘ri, «Liverpul» «Barselona» emas, shu ma'nodaki, jamoa so‘nggi 10 yilda ilk marotaba YeChL yarim finalida o‘ynamoqda va raqibni mensimaslik, muddatidan oldin o‘ziga ortiqcha baho berib yuborish holatlari bo‘lmaydi. Bu «Roma»ning vazifasini nisbatan yanada qiyinlashtiradi.

Ikkinchidan, endi «Roma» shunchaki, maydonga tushish va imkon tug‘ilsa, vaziyatni o‘zgartirish uchun emas, aynan hisobni tenglashtirish rejasi bilan o‘ynaydi. Chunki, «Barselona»ga qarshi o‘yin rimliklarga o‘ziga ishonishni o‘rgatib qo‘ydi. Stadiondagi muhit ham dastlabki daqiqalardan o‘sha chorak finaldagidan ko‘ra kuchliroq bo‘ladi. Bu endi, «Liverpul»ga oson bo‘lmasligini anglatadi. 

JAMOALAR HOLATI
Kechagi raqiblar haqida so‘z borganda, bunday rukn shart emasdi, chunki «Bavariya» uchun ham, «Real» uchun ham ichki chempionatda hammasi yakuniga yetgan, bor e'tiborni Chempionlar Ligasiga qaratishgandi. Bugungi juftlik murabbiylari uchun esa, vaziyat biroz mushkulroq, har ikki jamoa kelasi mavsumda YeChL da qatnashish huquqi uchun ayovsiz jang olib bormoqda.

Bu nuqtai nazardan, «Liverpul»ning kayfiyati raqibiga qaraganda biroz yomonroq deb aytish mumkin. Klopp jamoasi aynan YeChL o‘yinlari oldidan bo‘layotgan turlarda ichki frontda muvaffaqiyat qozona olmadi. «Vest Bromvich», «Everton» va «Stok Siti» bilan duranglar natijasida hozirda «Liverpul» o‘zini to‘liq xavfsiz his qila olmaydi. Yakshanba kuni liverpulliklar «Chelsi» maydoniga safar qilishini ham ta'kidlash kerak.
 
«Roma» esa, aksincha, aynan so‘nggi turlardagi g‘alabalari va «Inter»ning mag‘lubiyati tufayli, kuchli to‘rtlik uchun yaxshi imkoniyat hosil qilib oldi. «Roma» qolgan turlarda bir marta mag‘lubiyatga uchrashga haqqi bor endi. Shanba kungi o‘yinda «Roma» Kevo» ustidan yirik – 4:1 hisobida g‘alaba qozondi. Edin Jyeko ikki gol urgan bo‘lsa, Shik va El-Shaaravilar bittadan golni o‘z hisoblariga yozib qo‘yishdi. Xuddi shu hisob bugungi o‘yinda ham «Roma»ni qoniqtiradi. 

TARKIBLAR
Tarkiblardagi yo‘qotishlar kelsak, o‘tgan o‘yinda jarohat olgan «Roma» yarim himoyachilari Kevin Strotman va Diyego Perottilar javob o‘yiniga tiklanib ulgurmadilar va murabbiy ularni uchrashuv zayavkasiga kiritmadi. Ya'ni bu o‘yinchilarning bugun maydonga tushmasliklari aniq.

«Biz uni qamoqqa ketgan erini kutadigan vafodor ayol kabi kutamiz» – dedi Yurgen Klopp dastlabki o‘yinda jarohatlanib, nafaqat mavsum oxirigacha, balki Rossiyadagi jahon chempionatini ham o‘tkazib yuboradigan Oksleyd Chemberlen haqida. Emre Janning ham avvalroq safdan chiqqanini e'tiborga olsak, «Liverpul»ning bugungi o‘yindagi yarim himoyasini bemalol taxmin qilish mumkin – Veynaldum, Henderson va Jyeyms Milner.

Mavsum boshida jamoaning transfer bozorida faol emasligidan norozi bo‘lgan muxlislarga qarata Klopp qiziq gap aytgandi. Qanot himoyasiga yangi futbolchi sotib olayotganiga sha'ma qilib, biz endi yarim himoyada Milnerga ega bo‘lamiz, demak yangi ajoyib  yarim himoyachi sotib oldik, desak bo‘ladi, deb hazillashgandi. Chunki o‘tgan mavsumda Milner asosan chap qanot himoyasida to‘p surgan. Xullas, Milner bugungi «Liverpul» yarim himoyasida asosiy figura ekanini yana bir bor isbotlashi kerak. Bir YeChL mavsumida 8 golli pas bilan rekord qo‘ygan futbolchi endi «Roma»ning bosimini qaytarishda jonbozlik qilishiga to‘g‘ri keladi.

«Liverpul» tarkibida yana himoyachilar Matip va Gomeslar ham jarohatlanganlar safida ekanini ta'kidlash mumkin.

Chempionlar Ligasi rasmiy saytiga ko‘ra, jamoalarning quyidagi tarkibi taxmin qilinmoqda: 

ROMA: Alisson; Florentsi, Manolas, Fasio, Kolarov; Nainggolan, De Rossi, Pellegrini; Shik, Djyeko, El-Shaaravi.

LIVeRPUL: Karius; Aleksander-Arnold, Lovren, van Deyk, Robertson; Veynaldum, Xenderson, Milner; Salax, Firmino, Mane.

QIZIQARLI DUELLAR:
Bir-biriga tashqi tomondan ham o‘xshash bo‘lgan ikki murabbiydan tashqari, maydonda ham bir qator qiziqarli qarama-qarshiliklarning guvohi bo‘lishimiz mumkin. 
Muhammad Saloh bu yil ajoyib mavsumni o‘tkazmoqda va deyarli har bir o‘yinda maydonni golsiz tark etmayapti. Bu safar unga rimliklar darvozaboni Aliscon Beker qarshilik qiladi. Braziliyalik darvozabon ushbu mavsumda Yevropaning eng yaxshi darvozabonlaridan biriga aylandi va ba'zi xabarlarda uni aynan «Liverpul» o‘z safiga qo‘shib olmoqchi ekani haqida yozishmoqda. E'tiborli fakt, Aliscon chempionlar ligasida o‘z maydonidagi o‘yinlarda hali biror marta ham gol o‘tkazib yubormadi. Rimga «Atletiko», «Chelsi» va « Barselona» kabi top klublarning mexmon bo‘lganliklarini hisobga olsak, bu juda ajoyib ko‘rsatkich.

Yana bir qiziqarli qarama qarshilik narigi jarima maydonchasida kuzatiladi. Edin Djyeko o‘z vaqtida Angliya Premer Ligasida ham to‘p surgan, yuqori qavatlardagi kurashlarda benazir harakat qila oladi. Ayniqsa, Chempionlar Ligasida u juda samarali harakat qilyapti, xususan, «Barselona»ga qarshi o‘yinda aynan uning faolligi natijasida dastlabki ikki gol urilgandi. Katta ehtimol bilan, Yurgen Klopp raqibning eng xavfli hujumchisini to‘xtatish vazifasini Virjiyl van Deykka yuklasa kerak. Bunday duellarda Lovrenning ko‘p bora pand berganini kuzatganmiz. Dunyoning eng qimmat himoyachisi Edin Djyekoning YeChL dagi yurishini to‘xtatib qola oladimi?

E'TIBORLI FAKT
•  «Roma» o‘z tarixida faqat bir marta Chempionlar kubogi finaliga chiqqan. 1984 yilda rimliklar aynan «Liverpul»ga qarshi finalda o‘ynashgan va uchrashuv (1:1) penaltilar seriyasida inglizlarning g‘alabasi bilan yakunlangandi. 

O‘YIN OLDIDAN
Eusebio De Franchesko: 
«Motivatsiya jihatidan «Barselona»ga qarshi o‘yinga nisbatan hech narsa o‘zgarmadi. Biz hisobni tenglashtirish va yana bir buyuk g‘alabani amalga oshirishga urinib ko‘ramiz. «Liverpul» juda xavfli raqib, ozgina imkoniyat bersang, jazolashni juda yaxshi biladi. Ammo bir jamoa o‘z maydonida, YeChL yarim finalida va yetmish ming tomoshabin ko‘z o‘ngida oldindan taqdirda tan berishiga ishonasizmi? Yo‘q, biz oxirigacha kurashmoqchimiz. Agar ko‘p gol urmoqchi bo‘lsak, oldinga borishimiz kerak – albatta, bunday paytda himoya kuchsizlanadi, buni ham e'tiborga olamiz. Muhammad Saloh - juda kuchli futbolchi, ayniqsa uzun paslar bilan o‘ynaganda, xavf tug‘diradi, lekin biz uni qo‘riqlash uchun uch futbolchini jalb eta olmaymiz, to‘g‘rimi? Biz raqibning ustunliklari haqida o‘ylash bilan birga, o‘zimizning maqsadimizni unutmasligimiz kerak»

Yurgen Klopp:
«Rostdan ham «Olimpiko»ning o‘z sehri bormi, sinab ko‘ramiz. «Roma» yana bir bor jasorat ko‘rsatishi mumkin emas, deb aytmayman, albatta. Lekin biz «Chelsi» yoki «Barselona» ham emasmiz. Biz ham o‘z maydonimizda kuchlimiz, «Spartak»ni 7:0 hisobida yutgandik, masalan, lekin nima bo‘pti? Biz boshqacha o‘ynaymiz va bu o‘yinga tayyormiz, deb ayta olaman. Javob o‘yiniga uch to‘p farq bilan kelamiz deb o‘ylamagandim, lekin juda ham ideal holat deb ayta olmayman. Agar bizni finalchi deb e'lon qilishsa, ana unda ideal bo‘lardi, lekin bizni yana bir o‘yin kutib turibdi. O‘ynash kerak. «Roma» o‘z maydonida birorta ham gol o‘tkazmagan, biz esa hali mag‘lubiyatga uchramadik. Bu nima degani? Bu seriyalar o‘z holicha qolsa, biz keyingi bosqichga chiqamiz».

Qahramon Aslanov tayyorladi.