Nyu-York shtati ma'muriyati 2014 yil iyulida yopilgan turmani sotuvga qo‘ydi. Shatogay qamoqxona majmuasi 9 ming kvadrat metr maydonda joylashgan 30 ta inshootdan iborat bo‘lib, uning auksiondagi dastlabki bahosi 100 ming dollar qilib belgilangan. Bu haqda NY Post nashri ma'lum qildi.
Lotga 1990 yilda qurilgan zamonaviy binolar ham kiritilgan. Ular orasida ma'muriy va tibbiy majmualar, sobiq mahbuslar yotoqxonasi, ovqatlanish zali, oshxona, garajlar va ko‘plab inshootlar bor.
Turma shtat gubernatori Endryu Kuomoning bir nechta axloq-tuzatish muassasalarini yopish va mahbuslar sonini qisqartirishga qaratilgan rejasi doirasida o‘z faoliyatini to‘xtatgan. Majmua Kanada chegarasiga yaqin joyda – Kvebekdan 10 km uzoqlikda joylashgan va shu sababli shtat ma'muriyati uni Kanada kompaniyalari orasida strategik hududdagi joy sifatida ham reklama qilmoqda. Ta'kidlanishicha, auksion 24 iyulda bo‘lib o‘tadi.
