Anons: Bugun Angliyada «hayot-mamot to‘qnashuvi»

Angliya premer-ligasida chempion nomi allaqachon aniq bo‘lsa-da, ligada jon saqlab qolish va Chempionlar Ligasi yo‘llanmasini qo‘lga kiritish uchun kurash davom etmoqda. 

Bugun Uelsda, «Liberti Stedium»da bir necha jamoa taqdirini hal qilishi mumkin bo‘lgan qiziqarli uchrashuv bo‘lib o‘tadi. 
Turnir jadvalida 17-o‘rinda borayotgan «Sauthempton» «Suonsi» mehmoni bo‘ladi. Uelsliklar «Sauthempton» bilan bir xil ochko to‘plagan holda, 18-o‘rinda bormoqda. 

Demak, bu o‘yin to‘g‘ridan-to‘g‘ri APLda kelasi mavsumga ham qoladigan jamoa nomini aniqlashda eng markaziy o‘yindir.

Agar «Sauthempton» bugun g‘alaba qozonadigan bo‘lsa, amalda ligada qolish vazifasini bajardi, deyish ham mumkin. Zero, jamoada to‘plar nisbati -19, «Suonsi»da esa -26.  So‘nggi turda uelsliklar «Sauthempton»ni quvib o‘tish uchun kamida 9 to‘p farqi bilan yutishlari kerak bo‘ladi. Bu albatta, imkonsiz.

Agar «Suonsi» g‘alaba qozonadigan bo‘lsa, ular ham juda yaxshi imkoniyat hosil qilishadi. U holda jamoa oxirgi turda bir ochko olsa kifoya qiladi. So‘nggi tur ham «Liberti»da, ligani allaqachon tark etib ulgurgan «Stok Siti»ga qarshi kechishini hisobga olsak, vazifa u qadar qiyin bo‘lmaydi.

Ta'kidlash lozimki, bu o‘yin faqat mana shu ikki jamoagagina daxl qilmaydi. «Vest Bromvich Albion» atigi bir oy oldin umuman imkonsiz vaziyatda qolgan, qatorasiga 9 uchrashuvda mag‘lub bo‘lib, mart oyi oxiridayoq rasman APL bilan xayrlashish arafasida turgandi. Lekin jamoa «Manchester Yunayted», «Liverpul», «Tottenhem» kabi peshqadamlarga qarshi o‘yinda 7 ochko oldi, shuningdek, safarda «Nyukasl» ustidan g‘alaba qozonishga erishdi. Natijada, nazariy tomondan bo‘lsa-da, hali ham ligada qolish imkoniyatini saqlab turibdi.

«Suonsi» – «Sauthempton» o‘yinida tomonlardan biri g‘alaba qozonsa, «Vest Bromvich» shu bugunoq APL bilan rasman xayrlashadi. G‘arbliklar faqat bu o‘yinda durang qayd etilganda imkoniyatga ega bo‘lishadi. Agar bugun durang bo‘lib, so‘nggi turda «Suonsi» ham, «Sauthempton» ham mag‘lubiyatga uchrasa, «Vest Bromvich»da ularga yetib olish imkoni tug‘iladi. Shu o‘rinda, «Vest Bromvich» «Sauthempton»ning so‘nggi turda yirik hisobda mag‘lubiyatga uchrashini kutishi lozim. «Sauthempton»ning 38-turdagi raqibi «Manchester Siti» ekani qaysidir ma'noda «Vest Bromvich»ga umid bag‘ishlar, ammo boshqa tarafdan, «shaharliklar» chempionlikni nishonlab, masalan o‘z uyida «Haddersfild»ga ochko taqdim etganini hisobga olsak, yirik hisob ehtimoli juda kam bo‘lishi mumkin.

Darvoqe, «Haddersfild» haqida. Jamoa hozirda 36 ochko bilan 16-o‘rinda turibdi. Lekin ular ham ligada o‘rnini saqlab qolish uchun hali ter to‘kishlariga to‘g‘ri keladi. Aslida, bugun maydonga tushadigan «Suonsi» ham, «Sauthempton» ham yakunda ligada o‘z o‘rnilarini saqlab qolish imkoniyatlariga ega. Bugungi o‘yin qanday natija bilan tugashidan qat'i nazar, so‘nggi turda g‘alaba qozonib, «Haddersfild»ni quvib o‘tish imkoniyati har ikki jamoada ham mavjuddir. 

Buning uchun «Haddersfild» keyingi ikki o‘yinida umuman ochko olmasligi lozim bo‘ladi. Raqiblar – Chempionlar Ligasi uchun kurashayotgan «Chelsi» va Arsen Vengerning so‘nggi o‘yinda munosib kuzatib qo‘yish hammasidan ham muhim bo‘lgan «Arsenal». Oson emas, to‘g‘rimi?

Bu haqida keyinroq. Aniq bilamizki, bugun «Liberti»da saf tortadigan «Suonsi» ham, «Sauthempton» ham «Haddersfild» haqida o‘ylashgani yo‘q. Ularning taqdirlari hozircha o‘z qo‘llarida va maydonga tushib, g‘alaba qozonib, so‘nggi tur oldidan ushbu kichik turnirning favoritiga aylanishlarini yaxshi biladilar.

SO‘NGGI TURLARDAGI MUHIM O‘YINLAR:
8 may. 23:45. «Suonsi» – «Sauthempton»
9 may. 23:45. «Chelsi» – «Haddersfild»
13 may. 19:00. «Haddersfild» – «Arsenal»
13 may. 19:00. «Suonsi» – «Stok Siti»
13 may. 19:00. «Sauthempton» – «Manchester Siti»
13 may. 19:00. «Kristal Pelas» – «Vest Bromvich»