Andijon shahrida bo‘g‘ma kasalligiga gumon qilingan tashxis tasdiqlanmadi

Ayrim xorij internet nashrlarida Andijon shahrida yashovchi 3,5 yoshli bolada bo‘g‘ma (difteriya) kasalligi qayd etilganligi to‘g‘risida xabarlar berilgan edi.

Mazkur masalani joyiga chiqib o‘rganish maqsadida Sog‘liqni saqlash vazirligi Sanitariya-epidemiologiya nazorati Bosh boshqarmasi boshlig‘ining o‘rinbosari, tibbiyot fanlari nomzodi D.Tursunova boshchiligida mamlakatidagi yetakchi olim va shifokorlardan iborat tezkor guruh tashkil etilib, Andijon shahriga yuborildi. Bu haqda Sog‘liqni saqlash vazirligi axborot xizmati rahbari Furqat Sanayev KUN.UZ’ga xabar berdi.

Qayd etilishicha, joriy yilning 7 may kuni 2014 yil 21 avgustda tug‘ilgan A.Shuhratbekov “yiringli-nekrotik angina” birlamchi tashxisi bilan Andijon viloyati yuqumli kasalliklar shifoxonasiga yotqizilgan. 

Onasi bergan ma'lumotga ko‘ra, bemor bola 5 may kuni muzqaymoq iste'mol qilgan va 6 may kuni unda holsizlanish, injiqlik, rangini oqarishi kabi belgilar paydo bo‘lgan. 7 may kuni tana harorati ko‘tarilishi,  tomoqda og‘riq kuzatilgani bois bola viloyat yuqumli kasalliklar shifoxonasiga olib borilgan.

Shifoxonada mutaxassislar tomonidan bemor ko‘rikdan o‘tkazilgandan so‘ng, unga zamburug‘li angina birlamchi tashxisi qo‘yilib, o‘rtacha og‘irlikda reanimatsiya bo‘limiga yotqizilgan. Shundan so‘ng tahlil uchun tegishli biologik namunalar olinib, laboratoriyaga topshirilgan va barcha muolajalar vaqtida o‘tkazilgan. 

Bemor Sog‘liqni saqlash vazirligi tomonidan yuborilgan mutaxassislar tomonidan konsilium qilinib, takroriy tibbiy ko‘rikdan o‘tkazildi. Unga yiringli-nekrotik angina va bo‘g‘maga qo‘shimcha tekshirish buyurilgan.

Ta'kidlash joizki, bola 2 yoshga to‘lgunga qadar milliy emlash jadvaliga muvofiq, bo‘g‘ma kasalligiga qarshi 4 marotaba emlangan.

Ko‘rsatilgan malakali tibbiy yordam natijasida 11 may kuni bemor A.Shuhratbekovning umumiy salomatligi qoniqarli, deb baholangan. U faol harakatlanmoqda, ovqatlanishi yaxshi, isitmasi yo‘q. Yaqin kunlarda uyiga javob beriladi va shundan so‘ng bemor hududdagi tibbiy patronaj xizmati nazoratiga olinadi. 

Joriy yilning 11 may kuni mikrobiologik tahlil natijalari ham olingan. Andijon viloyati Davlat sanitariya-epidemiologiya nazorati markazi bakteriologiya laboratoriyasining 2018 yil 11 maydagi 56-, 57- va 284-sonli mikrobiologik tekshirish natijalari hamda kasallik klinikasi va kechishi asosida bemorga streptokokk etiologiyali yiringli-nekrotik angina yakuniy tashxisi qo‘yildi. 

Eslatib o‘tamiz, avvalroq Andijon viloyat yuqumli kasalliklar shifoxonasidagi to‘rt yoshli bolakay O‘zbekiston hududida bir necha o‘n yillardan beri kuzatilmagan yuqumli – difteriya, ya'ni bo‘g‘ma kasalligida gumon qilinayotgani haqida xabarlar tarqalgandi.