Davlat qo‘riqxonalari faoliyati tahlil qilinadi

Vazirlar Mahkamasining 4.05.2018 yildagi 339-son qarori bilan muhofaza etiladigan tabiiy hududlar faoliyati sohasiga doir bir qator nizomlar tasdiqlandi, deb xabar bermoqda Norma.
 
Chunonchi, quyidagilarni tartibga soluvchi Nizomlar tasdiqlandi:

• davlat qo‘riqxonalari va tabiat yodgorliklarining faoliyati;
• muhofaza etiladigan tabiiy hududlarni muhofaza qilishni tashkil etish.
 
Bundan tashqari, hujjatda Tabiat bog‘i to‘g‘risida, shuningdek Yuridik shaxs tashkil etgan va tashkil etmagan holda davlat (xususiy) buyurtma qo‘riqxonalari va tabiiy pitomniklar to‘g‘risidagi namunaviy nizomlar ham mavjud.
 
Ma'lumot uchun: davlat qo‘riqxonasi, buyurtma qo‘riqxona, tabiat bog‘i, davlat tabiat yodgorligi tushunchasi va ularning huquqiy rejimiga oid xususiyatlar «Muhofaza etiladigan tabiiy hududlar to‘g‘risida»gi Qonunda aks ettirilgan.  
 
Tasdiqlangan hujjatlar bilan muhofaza etiladigan tabiiy hududlarning turlari bo‘yicha quyidagilar qayd etilgan:

• ularni tashkil etish va faoliyat yuritishi, qayta tashkil etish va tugatish xususiyatlari;
• asosiy maqsadi, vazifalari va funksiyalari;
• boshqaruv va davlat nazorati tartibi;
• ayrim faoliyatni (ilmiy-tadqiqot, rekreatsion faoliyat, ekologik ta'lim, maorif va h.k.) amalga oshirish tartibi;
• hududiy tuzilishi xususiyatlari va rejim;
• muhofaza qilish chora-tadbirlari;
• mol-mulk va moliyalashtirish;  
• xodimlarni moddiy rag‘batlantirish.
 
1 sentabrgacha davlat qo‘riqxonalari faoliyati, shu jumladan boshqaruv samaradorligi, obektlar maydoni, joylashuvi, ekoturizm salohiyati, istiqbollari va bu boradagi faoliyatni yanada takomillashtirish tanqidiy tahlil qilinadi.
 
Tahlil natijalari asosida qo‘riqxonalar tizimi, ularning joylashuvi va boshqaruvini yaxshilash, shuningdek kadrlar salohiyatini kuchaytirishga doir choralar taklif etiladi.
 
Hujjat 8.05.2018 yildan kuchga kirdi.