Indoneziyadagi cherkovda portlashlar sodir etildi

Indoneziyaning ikkinchi yirik shahri bo‘lmish Surabayadagi xristianlik cherkovida 3 marta portlash sodir etildi. Associated Press xabariga ko‘ra, terakt oqibatida kamida 8 kishi halok bo‘lgan va 40dan ortiq kishi jarohatlangan.

Sharqiy Yava viloyati politsiya boshqarmasi rahbari Frans Barunganing ma'lumot berishicha, portlovchi qurilmalar avtomobillar va mototsikllarda kelgan xudkushlar tomonidan harakatga keltirilgan.

Aksilterror bo‘linma vakilining jurnalistlarga ma'lum qilishicha, ushbu hujum ortida mahalliy terroristik guruhlar turibdi va bu hujum biroz avvalroq Jakartadagi qamoqxonada ro‘y bergan tartibsizliklar bilan ham bog‘liq bo‘lishi mumkin. Asosan terrorchilik harakatlari uchun qamalgan mahbuslar saqlanadigan qamoqxonada o‘tgan haftada qo‘riqchilar bilan to‘qnashuvlar sodir etilishi oqibatida, 8 nafar politsiyachi halok bo‘lgandi.