Matbuot va axborot agentligi Namangandagi “Hidoya” bilim yurtiga adabiyotlar tuhfa qildi

O‘zbekiston matbuot va axborot agentligi tomonidan Namangan viloyatida o‘tkazilayotgan “Kitobxonlik kunlari” doirasida Namangan shahridagi “Hidoya” o‘rta maxsus islom bilim yurtiga diniy-ma'rifiy va badiiy adabiyotlar tuhfa qilindi. Bu haqda O‘zbekiston matbuot va axborot agentligi matbuot xizmati xabar bermoqda.

Uchrashuvda prezident Shavkat Mirziyoyevning shu yil 2-3 maydagi Namangan viloyatiga tashrifi doirasida Ishoqxon Ibrat yodgorlik majmuasida ziyolilar nuroniylar bilan suhbat chog‘ida Kosoniy, Ibrat kabi allomalarga munosib izdoshlar bo‘lish uchun kitobga, bilimga mehr qo‘yish lozimligi, kitobsiz, bilimsiz, ma'naviyatsiz taraqqiyotga erishib bo‘lmasligi ta'kidlanganining mohiyati haqida so‘z yuritildi.

Kuni kecha 130 nafardan ziyod talaba bilim olayotgan “Hidoya” o‘rta maxsus islom bilim yurti kutubxonasiga O‘zbekiston matbuot va axborot agentligi tizimidagi nashriyot-matbaa ijodiy uylarida nashr etilgan 100dan ziyod kitob sovg‘a qilindi.

– Bilim yurtimizda diniy bilimlardan tashqari ma'naviyat asoslari, ona tili, buxgalteriya hisobi, informatika fanlari ham o‘qitiladi, – deydi bilim yurti mudiri Abdulaziz Bobomirzayev. – O‘zbekiston matbuot va axborot agentligi rahbar-xodimlarining bugungi muloqoti esa talabalarimiz uchun o‘ziga xos ma'naviyat soati vazifasini o‘tadi. Shuningdek, agentlik tomonidan tuhfa etilgan kitoblar muassasamiz kutubxonasini yanada boyitdi va uzoq yillar mobaynida yoshlarning bu yerda olayotgan bilimini oshirishga xizmat qiladi.

– Kitob ham moddiy, ham ma'naviy boylikdir, – deydi O‘zbekiston matbuot va axborot agentligi bosh direktori Laziz Tangriyev. – Shuning uchun bundan qimmatliroq tuhfa bo‘lmasligi kerak. Kuni kecha Norin tumanida ham bo‘lib, 26-umumta'lim maktabi kutubxonasiga ikki mingdan ziyod kitob sovg‘a qildik. Demak, har bir kitobdan bir nafardan o‘quvchi foydalanib, undan nimadir olsa, bu tadbirning jamiyatga keltiradigan nafini bilib olish qiyin emas.