Qozog‘iston Respublikasi prezidenti Nursulton Nazarboyev G‘arbiy Qozog‘iston viloyatiga amalga oshirgan amaliy tashrifi chog‘ida Yoshlar va maktab o‘quvchilari saroyiga tashrif buyurdi. Bu yerda sog‘liqni saqlash va ta'lim sohasidagi raqamlashtirish bo‘yicha loyihalar taqdim etildi.
Oqo‘rda matbuot xizmati xabar berishicha, davlat rahbari viloyat yoshlari bilan uchrashgan. Ular prezidentga yosh mutaxassislarni qo‘llab-quvvatlashga qaratilgan davlat dasturlarini amalga oshirish jarayoni haqida so‘zlab berishdi.
Nazarboyev tez sur'atlar bilan rivojlanayotgan raqamli va axborot texnologiyalari sharoitida raqobatdosh yoshlarni shakllantirish zarurligini ta'kidladi.
«Maktablar va universitetlar ilm-fan bilan shug‘ullanishga yo‘naltirilgan. Zamonaviy sharoitda inson butun hayoti davomida o‘rganib borishi kerak. 5-6 yildan so‘ng hozirgi ko‘plab kasblar yo‘q bo‘lib ketadi, buning o‘rniga yangilari paydo bo‘ladi. Barcha umidimiz yoshlardan, ular tez rivojlanayotgan dunyodan qanday qilib ortda qolmasligimiz kerakligi haqida doimiy ravishda o‘ylashi kerak», - dedi N.Nazarboyev.
Eslatib o‘tamiz, avvalroq Rossiya prezidenti Vladimir Putin Qozog‘iston rahbari Nursulton Nazarboyev faol va iste'dodli yetakchi ekanini aytib, uning o‘z atrofida samarali, yosh va kuchli mutaxassislar yig‘a olish qobiliyatini ta'kidlab o‘tgandi.
