Italiyalik afconaviy darvozabon Janluiji Buffon "Yuventus"ni tark etmoqda. Turindagi 17 yillik davrida u juda ko‘p shaxsiy va jamoaviy sovrinlarni qo‘lga kiritdi, 11 marotaba Italiya chempioni, 4 marotaba kubok sohibi bo‘ldi, uch marta YeChL finalida o‘ynadi, (IFFHS uni 21-asrning birinchi o‘n yilligining eng yaxshi darvozaboni deb e'tirof etdi. Va yana u Italiya V Seriyasida ham "Yuventus" bilan ishtirok etdi. Jahon chempioni bo‘lgan darvozabon Turin jamoasi jazo sifatida qo‘yi ligaga tushirib yuborilganda juda ko‘p takliflarni rad etib, jamoasi bilan qolishni afzal bildi. Haqiqiy professional.
Aslida Buffon "Parma" klubi tarbiyalanuvchisi hisoblanadi. U 2001 yilda, 31 yoshida "Yuventus"ga ketdi. Turinliklar u uchun to‘lagan pul o‘sha davr uchun rekord edi - 34 million yevro. To o‘tgan yili "Manchester Siti" Ederson uchun ko‘proq to‘lamaguncha, Buffon dunyoning eng qimmat darvozaboni bo‘lib turgandi.
Bugun Buffonning "Yuventus" tarkibidagi so‘nggi uchrashuvi bo‘lib o‘tadi. Navbatdagi mavsumda ham mamlakat chempioni bo‘lgan turinliklar o‘z maydonlarida "Verona"ni qabul qiladilar. Mana shu o‘yindan keyin u faoliyatini yakunlash yoki boshqa jamoada davom ettirish borasida o‘z qarorini aytadi.
Payshanba kuni Janluiji Buffonning xayrlashuv matbuot anjumani tashkil qilindi.
"Men "Yuventus"dan ketaman, shanba kuni mening klubdagi so‘nggi uchrashuvim bo‘lib o‘tadi" - dedi u, - "bu yerdagi sarguzashtim ikki sovrin bilan nihoyasiga yetadi. Men bu yerda o‘ynaganim va jamoa uchun bor kuchimni sarf qilganimdan baxtiyorman".
Avvalroq, ommaviy axborot vositalari shu kuni 40 yoshli darvozabon faoliyatini yakunlaganini aytishini taxmin qilgandilar. Ammo bu qaror biroz ortga surildi. Hozirda Buffon uchun qiziqarli takliflar bor, shuningdek, "Yuventus"ning o‘zi klub boshqaruvida lavozim taklif etmoqda. Janluiji agar faoliyatini davom ettiradigan bo‘lsa, Italiyadan tashqarida bo‘lishi haqida aytdi.
"15 kun oldin men yakunlashimga amin edim. Ammo hozirda bir qancha qiziq takliflarga egaman. Ba'zilari futbolchi sifatida qiziqish bildirishgan, ba'zi takliflar esa, maydondan tashqaridagi faoliyat bilan bog‘liq. Kelasi hafta yakuniy qarorimni oshkor qilaman" - dedi darvozabon.
U agar futbolni tark etsa, menejyerlik yoki murabbiylikni o‘rgatadigan maxsus kurslarga qatnashni rejalashtiryapti. Klub prezidenti Andrea Anelli ham Buffonni qo‘llab quvvatladi va uning har qanday qarori klubda xayrixohlik bilan qabul qilinishini aytdi.
"Yuventus"da Buffonning o‘rnini darvozada Voysex Shchesni egallaydi. Jamoa sardori esa, Jorjio Kellini bo‘ladi. "Bizda ajoyib darvozabon Voysex bor. U mendan 13 yoshga kichik. U ilk kunlardanoq aqlli va kuchli darvozabon ekanini namoyish qilgandi. Kelliniga kelsa, unga maslahat berishim ham shart emas, u bilan uzoq yillar birga o‘ynadik va sardorlik vazifasini uddalashiga ishonaman" - bu ham qahramonimizning so‘zlari.
"Buffon biz bilan eng yaxshi kunlarimizda birga bo‘ldi va undan cheksiz minnatdormiz. Biz uning har qanday qarorini xurmat qilishimizni yaxshi biladi. Unga faqat rahmat aytishimiz va shanba kungi o‘yindan zavq olishimiz mumkin" - dedi matbuot anjumanida Anelli.
Klub bosh direktori Juzeppe Marotta afsonaviy futbolchini o‘rnini bosish klubga oson bo‘lmasligini alohida ta'kidladi. Bu yerda gap faqat yetti metrli darvozani qo‘riqlashda emas, Buffon jamoada haqiqiy yetakchi, ruhiy yo‘lboshchi va professional edi.
Italiyalik sobiq darvozabon Dino Dzoff ham Buffondagi professionalizm hammaga o‘rnak bo‘lishi kerakligiga urg‘u berdi:
"Men ishonch bilan ayta olamanki, u barcha davrlarning eng yaxshi darvozabonlaridan biridir. U professionalizmning yaqqol namunasidir, uning shuncha yillar ajoyib formasini saqlab kelgani va g‘alaba qozonishda davom etgani diqqatga sazovordir" - dedi Dzoff.
Buffon endi faoliyatini yakunlaydimi yoki boshqa klubda davom ettiradimi, bu muhim emas, u o‘z nomini futbol tarixiga zarhal harflar bilan yozib qo‘ygani aniq.
Qizig‘i, nafaqat raqib futbolchilari, hatto boshqa jamoa muxlislari ham uni yoqtirishi, o‘zinikidek qabul qilishi ham hayron qoldirmaydi hech kimni. Xuddi shunday bo‘lishi kerakdek. Buffon uchun ham "Yuventus" finalda yutishi kerak, Buffonga "Oltin to‘p" berish kerak, Buffon uchun Italiya chempionatga borishi kerak edi, Buffonga achindim - bunday gaplarni ko‘p eshitganmiz, aytganmiz.
Aslida Buffon haqida ko‘p yozish mumkin. Va aniqki, bu gaplarning birortasi yangilik bo‘lmasdi. 23 yil davomida uni kuzatib keldik, u bilan birga ulg‘ayib bordik, u bilan birga futbol bilan do‘stlashdik. Qaysidir ma'noda, Buffon bizning futbol olamidagi umrimizni aks etayotgandek. Yosh, navqiron, umidli, keyin esa, dunyoning eng yaxshilaridan biri, ana ketadi, mana ketadi, yana bir yil qolar ekan va hokazo. Uning mag‘lubiyatlarini ham, g‘alabalarini ham ko‘rdik. Har qanday vaziyatda uning bir xil - yig‘lab turgan holatini ko‘rardik. Kimdir professional deydi, kimdir sadoqatli, kimdir rostdanam zo‘r darvozabon deydi, kimdir madhiya aytishini maqtaydi. Lekin eng avvalo, uning mana shu yig‘lab turgan holati haqiqiy Buffonni, uning haqiqiy obrazini ifodalaydi: u barchasini qalbiga juda yaqin olardi. Yo‘q, yutqazishni bilmaslik, raqibdan alamini olish, kimnidir ayblash, yo‘q, unday emas. Biz doim uning eng birinchi bo‘lib raqibini tabriklayotganini ham ko‘rganmiz. U g‘alaba ham, mag‘lubiyat ham avvalo o‘z jamoasidan, o‘z mehnatidan ekanini hammadan yaxshi tushunardi go‘yo. Shuning uchun ham yig‘lardi. haqli ravishda mag‘lub bo‘lganidan, haqli ravishda g‘alaba qozonganidan yig‘lardi. Shuning uchun ham u mag‘lubiyatdan keyin ham yengilmasdi. Qaytib kelaverardi. Qaytib kurashaverardi.
Aslida Buffon haqida ko‘p yozish mumkin. Bu gaplarning birortasi ham yangilik bo‘lmaydi. Keling, yaxshisi uning ijtimoiy tarmoqda "Yuventus" muxlislariga atab yozgan maktubini o‘qiylik. Aslida u yerda ham yangi gap yo‘q. Faqat Buffondan chiqishi mumkin bo‘lgan, aynan Buffonga hammadan ko‘ra yarashadigan gaplar. Lekin baribir, negadir, o‘qiganingizda ta'sirlanasiz, endi birinchi eshitib turgan gaplardek, oldin hech qachon eshitmagan haqiqatdek qabul qilasiz.
Yaxshilik eskirmasligiga yorqin misoldir bu...
"Olti ming bir yuz o‘n bir kun. Ehtiros, quvonch, ko‘z yoshlar, mag‘lubiyat va g‘alabalardan iborat olti ming bir yuz o‘n bir kun...
Rahmat. Hammalaringga rahmat. Mening oq qora libosdagi olti ming bir yuz o‘n bir kunimga rang kiritganlaring uchun. Bu libos mening terimga aylandi. Men uni kiyib yurdim, yaxshi ko‘rdim, xurmat qildim. Bu libosni bor ehtirosim bilan himoya qildim.
Ertadan boshlab bu yo‘l tugaydi. Biz birgalikda yozgan bu qalin kitob yopiladi. Men o‘zimni tutib tura olmayapman.
Yangi kun, yangi kitob, yangi yo‘l boshlanadi. Buni ham bosib o‘tishim kerak.
"Yuventus" doimo har qanday futbolchidan buyuk bo‘lib qoladi. Klub yana o‘z saxifasiga yorqin damlarni, g‘alabalarni yozishda davom etadi. "Yuventus"ning xususiyati bu, o‘ziga xos va ajoyib.
"Yuventus" - mening oilam. Men hech qachon uni yaxshi ko‘rishdan, unga minnatdorchilik bildirishdan, uni uyim deb atashdan to‘xtamayman. U menga ko‘p narsa berdi. Men unga berganimdan ancha ko‘p.
Men endi kelajakka boshqacha boqmoqchiman. Yangi chaqiriqlar uchun tayyorman. Albatta, tashvishli kunlar ham bo‘ladi, axir bu men uchun yangilik emas, butun faoliyatim mag‘lubiyatlar va g‘alabalar o‘rtasida kechdi, har bir his oldingisidan farq qilar edi.
Men bu stadionga velosipedda kelgandim. Men juda yosh edim. Ertaga bu yerning har bir lahzasidan zavqlanib, tark etish g‘amini ham, bu tarixning bir bo‘lagi bo‘lish zavqini ham tuyib ketmoqchiman. Bilamanki, o‘z uyim deydigan bu yerdan ruhan uzoq bo‘la olmayman. Hech qachon. Mening ukalarim bo‘lgan jamoadoshlarim va bu yerdagi do‘stlarim bilan so‘nggi marta yonma yon bo‘laman.
Doimo siz bilan qoluvchi, sizning "Janluiji Buffon"
