Bugun Venesuelada prezident saylovlari bo‘lib o‘tadi

Venesuelada 20 may kuni prezident saylovlari bo‘lib o‘tadi. Mamlakat fuqarolari keyingi 6 yil uchun mamlakat prezidentini tanlashadi.

Saylovlarda 4 nomzod ishtirok etmoqda: amaldagi prezident Nikolas Maduro, muxolifatchi Enri Falkon, muhandis Reynaldo Kixada va sobiq pastor Xaver Bertuchchi.

Bu saylovlar shunisi bilan e'tiborliki, mamlakatning eng yirik muxolif uyushmasi “Demokratik birdamlik davra stoli” saylovlarga o‘z nomzodini qo‘ymaslikka qaror qildi va fuqarolarni ovoz berishda ishtirok etmaslikka chaqirdi. Shunga qaramay, muxolifatchi Falkon saylovlarda ishtirok etishga qaror qildi.

Ijtimoiy so‘rovnomalarning ko‘rsatishicha, aynan Maduro va Falkon g‘oliblikka asosiy da'vogarlar hisoblanadilar.  

Mamlakatda ovoz berish huquqiga 20,5 mln kishi ega. Ular uchun butun mamlakat bo‘o‘ylab 14,6 mingta saylov uchastkasi ishlaydi. Xavfsizlik esa 300 ming harbiy va politsiyachi tomonidan ta'minlanadi.