Janubiy Koreya prezidenti ma'muriyatidagi milliy xavfsizlik bo‘yicha boshqarma boshlig‘i Chon Iy Yonning fikricha, 12 iyunga rejalashtirilgan KXDR va AQSh yetakchilari sammiti rejaga ko‘ra bo‘lib o‘tishi deyarli aniq.
"Bizning fikrcha, KXDR-AQSh sammiti rejaga ko‘ra bo‘lib o‘tishi ehtimoli 99,9 foizni tashkil etadi. Biroq, biz turli voqealar rivojiga ham tayyorgarlik ko‘rmoqdamiz", - deya amaldorning so‘zlarini keltiradi Ryonxap agentligi.
Chon Iy Yon AQShga amalga oshirilayotgan tashrifda Mun Chje Inga hamrohlik qilmoqda. Uning so‘zlariga ko‘ra, yetakchilar “AQSh-KXDR sammitini muvaffaqiyatli o‘tkazish masalalari bo‘yicha ochiq muhokamalar o‘tkazadi, shuningdek, jiddiy kelishuvlar va ularni amalga oshirish yo‘llari ko‘rib chiqiladi”.
"Janubiy Koreya va AQSh eng kichik ma'lumotni ham bir biri bilan almashmoqda va qalin aloqada bo‘lib turibdi. Bizning fikrcha, Janubiy Koreya hamda AQSh yetakchilarining hozirgi muzokaralari yaxshi natija beradi. Unda KXDR masalasi dolzarb ahamiyat kasb etadi", - deya ta'kidlab o‘tdi Chon Iy Yon.
Bundan tashqari, amaldor New York Times gazetasining Qo‘shma Shtatlar prezidenti Donald Tramp KXDR yetakchisi Kim Chen In bilan o‘zaro uchrashuvni o‘tkazish masalasi bo‘yicha ma'muriyat vakillari bilan maslahatlashayotgani haqidagi xabarini rad etdi.
"Bu ham yetakchilarning telefon orqali muloqotida, ham mamlakatlarimiz Milliy xavfsizlik kengashlari vakillarining muzokaralarda tilga olinmadi", - deya ta'kidlab o‘tdi Chon Iy Yon.
Eslatib o‘tamiz, avvalroq Tramp Kim Chen In bilan uchrashuv borasida ikkilanayotgani xabar berilgandi.
