Ozarboyjon prezidenti Ilhom Aliyevning ma'lum qilishicha, Armaniston yangi rahbariyatidan Tog‘li Qorabog‘ mojarosiga yechim topish bo‘yicha «real muzokaralar» boshlashini kutmoqda. Bu haqda RIA «Novosti» xabar berdi.
«Umid qilamanki, Armaniston yangi rahbariyati avvalgi hokimiyat xatolarini takrorlamaydi hamda Tog‘li Qorabog‘dagi mojaroga tezroq yechim topish uchun jiddiy ishni amalga oshiradi. Shunchaki nomigagina emas, balki real muzokaralar jarayoni boshlanishi lozim», - deya aytib o‘tdi Aliyev.
Uning ta'kidlashicha, muzokaralar Kavkazda tinchlikni ta'minlashi mumkin bo‘lgan yechimni topishda yordam beradi. Shuningdek, Aliyevning so‘zlariga ko‘ra, Ozarboyjonning mojaroga tinch yechim topish uchun «huquqi bor».
Eslatib o‘tamiz, avvalroq Ozarboyjon prezidenti Ilhom Aliyev Ozarboyjon diplomatiya akademiyasi bitiruvchilari oldidagi nutqida Qorabog‘ ixtilofi Ozarboyjonning hududiy yaxlitligi doirasidagina o‘z yechimini topishi mumkinligini aytgandi.
