Tramp AQShni Jahon savdo tashkilotidan olib chiqmoqchi – OAV 

AQSh prezidenti Donald Tramp o‘z ma'muriyatining yuqori lavozimdagi amaldorlariga AQShni Jahon savdo tashkilotidan olib chiqmoqchiligini bir necha bor aytgan. Bu haqda Axios nashri xabar bermoqda. 

“U (Tramp) JSTdan chiqib ketish bilan 100 martalab dag‘dag‘a qilgan”, deb aytgan Tramp bilan bu masalani muhokama qilgan manba.

Uning aytishicha, Trampning fikricha, JST AQShga ziyon yetkazish uchun boshqa davlatlar tomonidan tashkil etilgan. “Men nima uchun biz bu tashkilotda ekanligimizni bilmayman”, deb aytgan Tramp.

Trampning iqtisodiyot bo‘yicha maslahatchilari uni JSTga a'zo bo‘lish AQSh uchun foydali ekanligiga ishontirishmoqchi bo‘lishgan. Misol uchun, AQSh 1995 yildan beri JSTga berilgan da'vo arizalaridan 85,7 foizida yutib chiqqan. Xitoyda esa bu ko‘rsatkich 66,7 foizni tashkil qiladi. Biroq Tramp bu dalillarga quloq solishni istamayapti, deb xabar qilgan manba.

Nashrning ta'kidlashicha, AQShning JSTdan chiqishi kongress tomonidan ma'qullanishi lozim.