Xorvatiya hukumati a'zolari yig‘ilishga terma jamoa futbolkalarida kelishdi

Xorvatiya hukumati a'zolari milliy terma jamoaning jahon chempionati finaliga chiqishiga original tarzda reaksiya bildirishdi.

Bugun, 12 iyul kuni o‘tkazilgan hukumat yig‘ilishiga vazirlar Xorvatiya terma jamoasi liboslarida kelishgan.

Xorvatiya terma jamoasi yarim final uchrashuvida Angliya terma jamoasini mag‘lubiyatga uchratdi. Bu terma jamoaning 1998 yildagi rekordi yangilanishi bo‘ldi, o‘shanda xorvatlar mundial yarim finaliga qadar yetib borishgandi.

Xorvatiya terma jamoasi endi 15 iyul kuni Moskvadagi «Lujniki» o‘yingohida Fransiya termasiga qarshi final uchrashuvida maydonga tushadi.

Eslatib o‘tamiz, Xorvatiya prezidenti Kolinda Grabar-Kitarovich futbolning ashaddiy muxlisi hisoblanadi. U turnir mobaynida Rossiyaga borib, oddiy muxlislar qatorida terma jamoa o‘yinlarini kuzatib kelmoqda.