Tramp Rossiya bilan yomon munosabatlar sababini aytdi

AQSh prezidenti Donald Trampning ma'lum qilishicha, Rossiya va Qo‘shma Shtatlar o‘rtasidagi yomon munosabatlarga AQSh tomonidan qo‘yilgan ahmoqona qadamlar sabab, deb hisoblaydi. Bu haqda Tramp tvitterdagi sahifasida yozgan.

AQSh prezidentining fikricha, Rossiya bilan munosabatlar hech qachon hozirgidek yomon ahvolda bo‘lmagan.

«Rossiya bilan munosabatlarimiz, Qo‘shma Shtatlar tomonidan ko‘p yillik ahmoqona harakatlar va betayinlik sabab hech qachon bundan yomon darajada bo‘lmagandi. Hozir esa, yana jodugarlarga ham ov e'lon qiling!», - deya ma'lum qilgan Tramp.

AQSh yetakchisi Xelsinkida bo‘lib o‘tadigan Rossiya hamda AQSh sammiti kuni shunday bayonot bilan chiqdi. Oq uy tomonidan e'lon qilingan jadvalga ko‘ra, Putin va Tramp yakkama-yakka uchrashuvi Toshkent vaqti bilan soat 15:20da boshlanadi. Taxminlarga ko‘ra, muloqot tushlikka ulanib ketadi, shundan so‘ng qo‘shma matbuot anjumani tashkil etiladi.