Bosh prokuror Otabek Murodov Dushanbega boradi

MDHga a'zo davlatlarning bosh prokurorlari muvofiqlashtiruv kengashining navbatdagi, 28-majlisi 2018 yil 20 sentabr kuni Dushanbe shahrida bo‘lib o‘tadi. Bu haqda «Aziya-Plyus» Tojikiston Bosh prokuraturasiga asosan xabar bergan.

Mahkama ma'lumotlariga ko‘ra, Rossiya bosh prokurori Yuriy Chayka raislik qiluvchi majlisda 9 mamlakat - Ozarboyjon, Armaniston, Belarus, Qozog‘iston, Qirg‘iziston, Moldova, Rossiya, Tojikiston va O‘zbekiston bosh prokurorlarining ishtirok etishi kutilyapti.

Bosh prokurorlar hamkorlikni rivojlantirish, axborot almashish, ish tajribasi va kadrlar tayyorlash sohasidagi masalalarni muhokama qiladi.

«MDH davlatlari prokurorlarining Dushanbe uchrashuvidagi kun tartibining yakuniy varianti ishlab chiqilmoqda», - deya xabar qilishgan vazirlikdan.