Lukashenko Xalqaro olimpiya qo‘mitasidan darg‘azab

Belarus prezidenti, mamlakat Milliy olimpiya qo‘mitasi rahbari Aleksandr Lukashenko Xalqaro basketbol federatsiyasi bosh kotibi Patrik Baumann bilan uchrashuv chog‘ida Xalqaro olimpiya qo‘mitasi (XOQ) harakatlarini tanqid ostiga oldi, deb xabar qilmoqda TASS.

«Bizda Xalqaro olimpiya qo‘mitasiga ko‘plab savollar bor. Mening fikrimcha, tuzilma shunchaki byurokratik emas, u ba'zida mas'uliyatsiz hamdir. U yerda qandaydir lavozimni egallagan shaxslar juda tezlik bilan «bronzalashadi». Men Milliy olimpiya qo‘mitasi rahbari sifatida navbatdagi tadbirda xalqaro sport jamoatchiligiga bu ma'lumotni yetkazishga majburman», - dedi Lukashenko.

Belarus prezidenti XOQ dopingga nisbatan qoidalar bo‘yicha siyosatini o‘zgartirishiga umid bildirmoqda.

«Biz halol sport tarafdorimiz, biz xalqaro tashkilotlarning shaffof faoliyati tarafdorimiz, jumladan XOQning ham», - deya qo‘shimcha qilib o‘tdi u.