Shavkat Mirziyoyev bugun 61 yoshga to‘ldi

Bugun, 24 iyul kuni O‘zbekiston Respublikasi Prezidenti Shavkat Miromonovich Mirziyoyev 61 yoshni qarshiladi. Kun davomida dunyo davlatlari rahbarlaridan qutlovlar kelishi davom etmoqda.

Shavkat Mirziyoyev 1957 yilning 24 iyulida Jizzax viloyatining Zomin tumanida, shifokor oilasida tug‘ilgan. 1981 yili Toshkent irrigatsiya va qishloq xo‘jaligini mexanizatsiyalash muhandislari institutini tugatgan. Muhandis-mexanik mutaxassisligiga ega. Texnika fanlari nomzodi, dotsent.

Mehnat faoliyatini 1981 yilda Toshkent irrigatsiya va qishloq xo‘jaligini mexanizatsiyalash muhandislari institutida boshlab, kichik ilmiy xodim, katta o‘qituvchi, dotsent, o‘quv ishlari bo‘yicha prorektor lavozimlarida ishlagan. 1992 yilda Toshkent shahrining Mirzo Ulug‘bek tumani hokimi lavozimiga tayinlangan, 1996–2001 yillarda Jizzax viloyati, 2001–2003 yillar mobaynida Samarqand viloyati hokimi sifatida faoliyat ko‘rsatgan.

Sh.Mirziyoyev 2003 yilda O‘zbekiston Respublikasining Bosh vaziri etib tasdiqlandi va 2005, 2010, 2015 yillarda Oliy Majlis palatalari tomonidan ushbu lavozimga yana uch marta qayta tasdiqlandi.

2016 yil sentabrida O‘zbekistonning birinchi prezidenti Islom Karimov vafotidan keyin vaqtincha davlat rahbariga aylandi, 2016 yilning oktabrida O‘zbekiston Liberal-demokratik partiyasi tomonidan prezidentlik uchun saylovga nomzod sifatida ko‘rsatildi, 4 dekabr kuni o‘tkazilgan saylovda mutlaq ustunlikka erishib (88,61 foiz ovoz), O‘zbekiston Respublikasi prezidentiga aylandi.

Yangi prezident lavozimga kirishgach, uzoq vaqt kutilgan islohotlar o‘tkaza boshladi, avvalgi epoxadagi yirik amaldorlarning korruptsion jinoyatlari fosh etila boshlandi. Prezident tashabbusi bilan 2017 yil «Xalq bilan muloqot va inson manfaatlari yili» deb ataldi, yil davomida davlat tashkilotlari «Xalq davlat idoralariga emas, balki davlat organlari xalqqa xizmat qilishi kerak» shiori ostida ishlay boshladi, prezident va xalq qabulxonalari ochilib, murojaatlar asosida odamlarning muammolari hal etib berila boshladi.

Shavkat Mirziyoyev prezidentligi davrida ijtimoiy-iqtisodiy masalalar bilan bir qatorda ta'lim, fan, sog‘liqni saqlash tizimlarini zamonaviy talablar asosida rivojlantirish, yoshlarning sog‘lom va barkamol bo‘lib voyaga yetishlari uchun munosib shart-sharoitlar yaratish, onalik va bolalikni kuchli muhofaza qilish ustuvor vazifa sifatida muhim o‘rin egalladi. Xususan, endi o‘quvchi va talabalar, o‘qituvchilar majburiy mehnatga jalb etilishi taqiqlandi, pedagoglarning oylik maoshlari miqdorini oshirish bo‘yicha topshiriqlar berildi.

Tashqi siyosatda esa respublikaning yangi rahbariyati barcha bilan murosa qilish yo‘lidan ketmoqda. Shavkat Mirziyoyev prezidentligining ilk haftalaridanoq qo‘shni respublikalar bilan aloqalarni tiklashga kirishib, Markaziy Osiyo tarixida yangi davrni ochib berdi. O‘zbekiston Sharq bilan ham, G‘arb bilan ham, Rossiya bilan ham, AQSh bilan ham birdek munosabat olib borishga harakat qilmoqda.

«Kun.uz» tahririyati mamlakat prezidentini tavallud ayyomi bilan muborakbod etib, unga sog‘lik va salomatlik, oldinga qo‘yilgan maqsadlar, boshlangan islohotlar ro‘yobiga erishish yo‘lida kuch-quvvat tilaydi. El tinchligi, yurt farovonligi, mamlakat ravnaqi yo‘lida aslo charchamang, janob Prezident!