“O‘zbekkino” huzurida yangi markaz tashkil etildi

O‘zbekiston Respublikasi prezidenti “Milliy kinoindustriyani rivojlantirish bo‘yicha qo‘shimcha chora-tadbirlar to‘g‘risida”gi qarorni imzoladi. 

Hujjat bilan quyidagilar asosiy vazifalari etib belgilangan “O‘zbekkino” Milliy agentligi huzurida Kinoindustriya sohasi xodimlarini qayta tayyorlash va ularning malakasini oshirish markazi tashkil etildi:

kinoindustriya sohasining, mulkchilik shaklidan qat'iy nazar kinokompaniyalarning ijodiy-ishlab chiqarish, texnik va boshqa xodimlarini shartnoma asosida rejissura, prodyuserlik, aktyorlik mahorati, kinooperatorlik, animatsiya va boshqa yo‘nalishlar bo‘yicha qayta tayyorlash hamda ularning malakasini oshirish;

nazariy jihatdan tayyorlashni amaliy ishlar bilan integratsiya qilish, kinoindustriya sohasida tajribaga ega malakali o‘qituvchilar va mutaxassislarni, shuningdek, xorijiy ekspertlarni qayta tayyorlash va malaka oshirish jarayonlariga jalb qilish;

metodik va axborot bazasini yaratish, yaxshilash, doimiy yangilab borish, kinoindustriya sohasi xodimlarini qayta tayyorlash va ularning malakasini oshirish bo‘yicha zarur o‘quv qo‘llanmalari hamda tavsiyalarini ishlab chiqish;

kinoindustriya sohasi xodimlarini xorijiy kinokompaniyalarda qayta tayyorlanishi va ularning malakasi oshirilishini tashkil etish, chet ellik hamkorlar bilan yaqin aloqalarni yo‘lga qo‘yish.

Belgilab qo‘yilishicha:

Markaz davlat unitar korxonasi shaklida tashkil etiladi;

Markaz kinoindustriya sohasining, mulkchilik shaklidan qat'iy nazar kinokompaniyalarning ijodiy-ishlab chiqarish, texnik va boshqa xodimlarini o‘qitish uchun olinadigan mablag‘lari, shuningdek, qonun hujjatlarida taqiqlanmagan boshqa manbalar hisobidan moliyalashtiriladi;

Markazga “O‘zbekkino” Milliy agentligi bosh direktori tomonidan lavozimga tayinlanadigan va egallab turgan lavozimidan ozod etiladigan direktor rahbarlik qiladi.