AQShda mashina kutilmaganda paydo bo‘lgan o‘raga quladi

AQShda yo‘ltanlamas avtomobil qo‘qqisdan paydo bo‘lgan o‘raga tushib ketdi. Hodisa Kolorado shtatidagi Sheridan shahrida sodir bo‘ldi. Toyota RAV4 rusumli avtomobil chuqurligi 4,5 metrli o‘raga tushib ketdi va suv ostida qoldi. Uni boshqargan Eshli Merish mashina ichidan chiqib olishga muvaffaq bo‘lgan. Bu voqeani o‘sha joyda bo‘lgan Tay Adams tasvirga olgan. 

«Ishga ketayotib mashina yer ostiga tushib ketishini ko‘raman deb hech qachon o‘ylamagandim. 40 ming dollar quvur ichiga ravona bo‘ldi», — dedi u jurnalistlarga.

Mashina egasi bu dahshatdan hali ham o‘ziga kelolmayotganini aytdi. 

«Hali ham o‘zimga kelolmayapman, ammo omadli ekanimdan xursandman», — dedi u.

Dastlabki ma'lumotlarga qaraganda, hodisaga kuchli yomg‘irlar sabab bo‘lgan. 

«Yarim soat ichida 63 millimetr yog‘in yog‘ishi natijasida yer ostidan o‘tgan quvur 1,7 atmosfera bosimi ostida qolgan. Quvur bunday bosimga dosh berolmay yorilib ketgan», — dedi shahar hokimiyati vakili.

2015 yilda xuddi shu chorrahada ana shunday hodisa sodir bo‘lgandi. O‘shanda politsiya avtomobili o‘raga tushib ketgandi.