Senatorlar Tramp vakolatlarini cheklashmoqchi

4 nafar amerikalik senator AQSh prezidenti Donald Trampning vakolatlarini cheklovchi qonun loyihasi ishlab chiqishdi. Agar hujjat qabul qilinsa, Tramp AQShni kongressning yuqori palatasi ruxsatisiz NATOdan olib chiqa olmaydi. Bu haqda The Washington Post nashri ma'lum qilgan.

Qonun loyihasini senatning xalqaro aloqalar bo‘yicha qo‘mitasi a'zolari – respublikachi Kori Gardner va demokrat Tim Keyn, senatning qurolli kuchlar bo‘yicha qo‘mitasi raisi –respublikachi Jon Makkeyn va yuqori lavozimli demokrat Jyek Rid ishlab chiqqan.

“Afsuski, prezident Trampning yaqin ittifoqdoshlarimiz bilan nomunosib munosabati Amerikaning transatlantik alyansga va mudofaa sohasidagi qadriyatlarga sodiqligiga shubha uyg‘otdi. Bu qonun birorta prezident AQShni senat roziligiz NATOdan olib chiqib keta olmasligi uchun zudlik bilan zarur”, deb aytgan Makkeyn.
 
Qonun loyihasiga ko‘ra, AQShning NATOdan chiqishi uchun senatorlarning uchdan ikki qismi ovoz berishi kerak.
 
Nashrning yozishicha, amerikalik senatorlarning bu “oxirgi sa'y-harakatlari” Trampni AQSh siyosiy yo‘nalishini Rossiya tomon burishidan ushlab qolishga qaratilgan.