Angliyada transfer oynasi yopilishiga sanoqli soatlar qoldi. Bugun Toshkent vaqti bilan soat 21:00dan keyin ingliz klublari o‘z safiga yangi futbolchi qo‘shib ololmaydi. Butun Yevropa jamoalari transferlar orqali kuchayishga urinayotgan keyingi uch haftada ingliz jamoalari bor e'tiborini futbolga qaratishadi.
NeGA O‘ZGARTIRILDI?
So‘nggi yillarda eng oxirgi soatlarda futbolchini sotib olish yoki sotish odat tusiga kirib qolgandi. Hatto transferni hal qilish uchun sanoqli soniyalar yetmay qolgan voqealarga ham guvoh bo‘lganmiz.
Klublar so‘nggi daqiqalarni kutish orqali, nimani ko‘zlashlari mumkinligini aniq aytish qiyin. Balki bunday vaziyatda o‘z talablarini qo‘yish sotuvchi yoki ba'zida oluvchi klub uchun ham qulayroq bo‘lishi mumkin. Aynan shuning uchun ham transferlarni mavsum boshlanishidan avval yakunlashga talab paydo bo‘ldi.
O‘tgan yilning kuzida o‘ziga xos referendum bo‘lib o‘tgandi. Dedlaynni oldinroqqa surishga 70 foizdan oshiq klublar rozi bo‘ldi.
Faqat 5 klub bu o‘zgarishga qarshi chiqdi. Manchesterning ikki klubi, «Kristal Pelas», «Uotford» va «Suonsi» transfer darichasi avvalgidek qolishi istashgan bo‘lishsa, «Byornli» betaraf qoldi. Shuning bilan Angliyada yangi davr boshlandi – endi transferlar darichasi birinchi turning ilk uchrashuvidan bir kun oldin yopiladi. Yevropada faqat Finlyandiyada ham transferlar mana shunday erta yakuniga yetadi.
PLYuS va MINUSLAR
Tarafdorlarning fikri tushunarli – transfer darichasining berkilishi mavsum boshlanib bo‘lgandan keyingi o‘tishlarni keskin kamaytiradi va klublar muhim futbolchilarni yo‘qotishmaydi. Lekin boshqa muhimroq jihat bor.
Bu qaror futbol uchun foydalidir. Axir endi futbolchilar mavsum boshlangach, diqqatlarini faqat o‘yinlarga jamlashlari mumkin, boshqa fikrlarga chalg‘imaydilar. Murabbiylar bor e'tiborlarini jamoa o‘yinini kuchaytirishga qaratadilar, biror transfer orqali kuchayish haqida o‘ylamaydilar. «Yana bir nechta yangi futbolchi kelsa, o‘yinimiz yaxshilanadi» degan gaplar ham bo‘lmaydi.
O‘z navbatida, qarshilarni ham tushunish mumkin. Birinchidan, uch hafta juda katta muddat. Bu pallada klub biror futbolchisidan jarohat tufayli ajralib qolishi ham mumkin. Bu holatda futbolning o‘rnini to‘ldirish imkoni bo‘lmaydi.
Ikkinchidan, chetda transfer oynasi hali ochiq bo‘ladi. Boshqacha aytganda, ingliz klublari o‘z futbolchilaridan ajralib qolishlari mumkin, ammo o‘rniga boshqasini sotib olisholmaydi. Tasavvur qiling, shartli «Barselona» Pogbani qo‘lga kiritishning uddasidan chiqsa, Mourino o‘z muhim futbolchisidan ayriladi va o‘rniga boshqa nomzodni ololmaydi.
